Pse s’u ftua Ardon Jashari për ndeshjen me Kosovën? Arsyen e tregon trajneri i Zvicrës

Futboll

Gazeta Express

05/11/2025 12:35

Selektori i Kombëtares së Zvicrës, Murat Yakin e publikoi sot listën e futbollistëve të ftuar për dy ndeshjet e nëntorit, ndaj Suedisë dhe kundër Kosovës.

Trajneri i Helvetikëve i përfshiu në listë tre shqiptarë: Granit Xhakën, Adrian Bajramin dhe Andi Zeqirin, por listës i mungon Ardon Jashari, ndonëse pritej që të ishte pjesë e ekipit për ndeshjet vendimtare të këtij muaji, shkruan “Gazeta Express”.

E trajneri zviceran e ka sqaruar përmes konferencës për shtyp mospërfshirjen në listë të futbollistit të ri të Milanit, i cili vetëm së fundmi u rikthye nga një lëndim që e kishte pësuar, i cili e kishte lënë jashtë fushave të blerta për një kohë të gjatë.

“Ardoni është rikthyer së fundmi dhe nuk është ende në 100% të tij. Prandaj, e planifikuam këtë kamp stërvitor pa të – gjë për të cilën u dakorduam edhe me të”, deklaroi Yakin.

Jashari kishte munguar edhe në ndeshjen e parë që e kishin zhvilluar dy Kombëtaret në muajin shtator, të cilën e fitonin Helvetikët me rezultat, 4:0. /Gazeta Express