Pse po rritet numri i të infektuarve me Covid-19 në Kosovë?

Lajme

Gazeta Express

23/02/2021 20:39

Ditëve të fundit në Kosovë është vërejtur rritje e numrit të të infektuarve me Covid-19. Shkas për këtë mund të jetë mos respektimi i masave anti-covid-19 gjatë fushatës zgjedhore nga ana e partive politike.

Infektologu Hamdi Ramadani, tha se numri i personave të infektuarve mund të rritet gjatë ditëve në vijim.

“Është shumë e sigurt se edhe kjo vala e tubimeve të ditëve të kaluara është faktor stimulues që ka bërë që numri i të sëmurëve me Covid-19 të ketë rritje vazhdimisht”, tha Ramadani për RTV21.

Përfaqësuesi i Shoqatës për të Drejtave të Pacientëve Besim Kodra, thotë se për mos respektimin e masave nga ana e partive politike që ndikoi në rritjen e numrit të të infektuarve, përgjegjës janë institucionet publike të shtetit.

“Kjo do tu bjerë përgjegjësi institucioneve publike. Shteti e ka humb seriozitetin në luftimin e pandemisë për shkak të fushatave të shfrenuara të partive politike. Kjo nuk mund t’i bind më qytetarët për t’i respektuar vendimet”, theksoi ai.

Numri total i rasteve pozitive në pesë ditët e fundit në Kosovës është 1575 raste ndërsa të shëruar 1704 përderisa numri i vdekjeve është 17.