Presidenti i Interit i kundërpërgjigjet ashpër Juventusit, ia kujton rastin kur simuloi Cuadrado

Futboll

Gazeta Express

16/02/2026 18:53

Presidenti i Interit, Beppe Marotta, mendon se Alessandro Bastoni ka qenë subjekt i një “ekspozimi të tepruar mediatik” dhe iu kundërpërgjigj Juventusit, duke kujtuar një simulim “të qartë” të Juan Cuadrado në vitin 2021 që, sipas tij, ndihmoi bardhezinjtë të siguronin Ligën e Kampionëve.

Situata kontroverse rreth Inter – Juventus dhe kartonit të kuq për Pierre Kalulu vazhdon.

Marotta foli para një takimi të Serie A në Milano, duke theksuar se Bastoni po përballet me një “linçim publik” që shkon përtej asaj që ndodhi realisht.

“Është një i ri që përfaqëson një vlerë për kombëtaren tonë, ndaj është e padrejtë të vihet në dyshim pjesëmarrja e tij. Kush nuk gabon? Që nga vitet ’50 ka pasur lojtarë të famshëm për veprime të tilla. Është një episod i zakonshëm, jo i jashtëzakonshëm,” tha ai.

Marotta kujtoi se sezonin e kaluar Inter humbi titullin për një pikë, pas një gabimi të konfirmuar në Inter – Roma, por klubi nuk protestoi.

Sipas tij, këtë sezon Interi ka ndërhyrë vetëm pas një penalltie të dhënë në Napoli – Inter që më vonë u konsiderua e padrejtë.

Duke iu përgjigjur reagimit të Juventusit, ai rikujtoi një episod nga 2021.

“Dua të kujtoj Juventus – Inter dhe një penallti të dhënë pavarësisht një simulimi të qartë të Cuadrados. Më pas edhe arbitri dhe organet teknike e konfirmuan. Me atë fitore Juventus u kualifikua në Ligën e Kampionëve, që vlen 60–70 milionë euro.”

Marotta pranoi se simulimi i Bastonit kundër Juventusit nuk përputhet me parimet e fair-play dhe kërkoi sanksione më të forta, veçanërisht financiare.

Ai theksoi nevojën për dialog mes klubeve, arbitrave dhe federatës për të rritur njohjen e rregullave.

Drejtori i Juventusit Giorgio Chiellini kishte kritikuar gjykimin pas ndeshjes, ndërsa trajneri Luciano Spalletti nuk foli publikisht.

Marotta, megjithatë, u shpreh ironikisht për Chiellinin:

“Ishte minimumi ta përshëndesja, pasi ka qenë një nga lojtarët e mi. Sot është një drejtor i ri dhe pa shumë përvojë, por nuk guxoj t’i jap këshilla.”/GazetaExpress/