Presidenti Begaj uron Bajramin nga qyteti i shenjtë i Mekës

Lajme

Gazeta Express

27/05/2026 8:11

Presidenti i Shqipërisë, Bajram Begaj ka uruar festën e Kurban Bajramit nga qyteti i shenjtë i Mekës.

Përmes një postimi në Facebook, Begaj uroi besimtarët myslimanë për më shumë begati, shëndet, harmoni dhe mirësi në familjet e tyre.

“Kurban Bajrami është kujtesë për sakrificën, përkushtimin ndaj Zotit, solidaritetin me njëri-tjetrin dhe kujdesin për ata që kanë më shumë nevojë. Shoqëria bëhet më e fortë kur njerëzit ndajnë jo vetëm gëzimin, por edhe dhembjen dhe përgjegjësinë për tjetrin. Festa si Kurban Bajrami na rikujtojnë vlerat që i kemi mbajtur gjallë ndër shekuj: besimin, familjen, mikpritjen dhe respektin për njëri-tjetrin”.

“Jam veçanërisht i nderuar që këtë festë ta pres në Mbretërinë e Arabisë Saudite me ftesë të Mbretit Salman bin Abdulaziz Al Saud, në vendin ku miliona besimtarë nga e gjithë bota bashkohen në lutje, përulësi dhe paqe. Gëzuar Kurban Bajramin! Zoti sjelltë paqe, mirësi dhe begati në çdo vatër shqiptare!”, ka shkruar ai.