Politika uron nxënësit për nisjen e vitit të ri shkollor

Shqiperi

Gazeta Express

08/09/2025 15:16

Fillimi i vitit të ri shkollor 2025-2026 është shoqëruar me urime nga krerët më të lartë të shtetit për nxënësit dhe mësuesit në të gjithë vendin.

Presidenti Bajram Begaj zgjodhi të rikthehej në shkollën e tij të fëmijërisë, në fshatin Gosë të Kavajës, për të dhënë mesazhin e tij për brezin e ri. “Një shkollë e fortë formëson qytetarë të ditur. Qytetarët e ditur ndërtojnë shoqëri të zhvilluar, të ardhme të ndritur dhe Shqipëri të fortë. Uroj, besoj dhe shpresoj që ju të jeni një brez që e do gjuhën shqipe, ka pasionin e dijes, përqafon teknologjinë, çmon dhe respekton njëri-tjetrin”, tha presidenti Begaj.

Kryeministri Edi Rama përmes rrjeteve sociale i uroi suksese rreth 345 mijë nxënësve që u ulën sot në bankat e shkollës. Ai veçoi nisjen e rrugëtimit të parë për 26.500 fëmijët e klasës së parë, duke e cilësuar atë si “rrugën e bukur të dijes”.

Nga Tirana, kryetarja e Kuvendit Lindita Spiropali përcolli urimet e saj nga Instituti i Nxënësve që Nuk Shikojnë “Ramazan Kabashi”.“Përgëzoj edukatorët, mësuesit, ata që iu qëndrojnë pranë fëmijëve sepse kanë një mision të jashtëzakonshëm,” u shpreh Spiropali.