Policia shqiptare gjen fëmijën e humbur në Velipojë

Lajme

Gazeta Express

17/08/2025 18:00

Një dyvjeçar që kishte humbur pasi ishte larguar nga prindërit e tij në plazhin e Velipojës është gjetur pas intervenimit të policisë.

Salla Operative e Stacionit të Policisë Velipojë u njoftua nga një familje pushuese se djali i tyre i mitur ishte larguar dhe nuk po e gjenin dot.

Menjëherë pas marrjes së njoftimit, shërbimet e Policisë në zonën e plazhit u angazhuan në kërkime intensive në terren.

Punonjësit e policisë në Velipojë ia dorëzuan familjes, në gjendje të mirë shëndetësore, djalin dyvjeçar, raporton KosovaPress.

Prindërit e djalit falënderuan shërbimet e policisë për reagimin e menjëhershëm dhe përkushtimin në këtë rast.

Policia e Shtetit u bën apel pushuesve që të tregojnë kujdes të shtuar për fëmijët e tyre, veçanërisht në zonat e mbipopulluara, si plazhet.