Policia për të riun nga Vitia: Vdekja nuk ka ardhë si pasojë e aksidentit

Gazeta Express

08/06/2025 21:26

I.H., 26-vjeçar nga Pozherani i Vitisë ka humbur jetën sot në autostradën “Arbën Xhaferi”. Për këtë ngjarje tragjike policia ka dhënë detaje shtesë, duke informuar se pas ekzaminimeve fillestare nga hetuesit e trafikut, “është konstatuar se vdekja e viktimës nuk ka ardhur si pasojë e aksidentit”.

Rasti është hapur si “hetim mbi vdekjen”.

Njoftimi i plotë i policisë:

Më datë 08.06.2025, rreth orës 13:15, jemi njoftuar nga një qytetar për gjetjen e trupit të pajetë të viktimës I.H (M/K) i moshës 26 vjeç.

Dyshohet se viktima kishte pësuar aksident trafiku rreth orës 05:00 të mëngjesit në autostradën “Arbën Xhaferi”, afër fshatit Bob, komuna e Kaçanikut.

Menjëherë pas pranimit të informacionit, në vendin e ngjarjes kanë dalë njësitet përkatëse të Trafikut të Autostradës. Pas ekzaminimeve fillestare nga hetuesit e trafikut, është konstatuar se vdekja e viktimës nuk ka ardhur si pasojë e aksidentit.

Në vendin e ngjarjes kanë dalë edhe hetuesit e stacionit policor Kaçanik, ndërsa rreth orës 16:45, janë angazhuar edhe Hetimet Rajonale dhe Forenzika Rajonale.

Për të gjitha veprimet policore është njoftuar prokurori për krime të rënda nga Prokuroria Themelore e Ferizajt, i cili ka autorizuar inicimin e rastit si: “Hetim mbi vdekjen”.

Për informata shtesë, do të njoftoheni pasi të kryhen ekzaminimet e nevojshme nga hetuesit rajonal.