Policia e Kosovës përfaqëson Prishtinën në Konferencën e 45-të të Policive të Kryeqyteteve Evropiane në Madrid

Lajme

Gazeta Express

29/05/2025 23:27

Në kryeqytetin spanjoll, Madrid, ka nisur punimet Konferenca e 45-të e Policive të Kryeqyteteve Evropiane, ku po merr pjesë edhe një delegacion nga Policia e Kosovës.

Kosovën në këtë ngjarje ndërkombëtare po e përfaqësojnë Nënkolonel Basri Shabani, Drejtor i Drejtorisë Rajonale të Policisë së Prishtinës, dhe Major Bekim Bislimi, Drejtor i Drejtorisë së Kryeqytetit.

Konferenca ka filluar më 27 maj dhe do të përmbyllet nesër, me miratimin e një deklarate të përbashkët nga shtetet pjesëmarrëse, që do të përmbledhë pikat kryesore të dala nga diskutimet dhe temat e trajtuara.

Ndër temat kryesore që po diskutohen në këtë forum ndërkombëtar janë:

Trajtimi i rasteve të dhunës në familje dhe bazuar në gjini,

Siguria kibernetike,

Siguria në trafikun rrugor në kryeqytete.

Qëllimi i konferencës është shkëmbimi i përvojave mes forcave policore të kryeqyteteve evropiane dhe identifikimi i metodave efikase për koordinim më të mirë, rritje të cilësisë së bashkëpunimit dhe përmirësim të përpjekjeve të përbashkëta në parandalimin e dukurive negative.

Konferenca e ardhshme e këtij formati do të mbahet në vitin 2026, në Helsinki të Finlandës.