Po kthehej në Shqipëri, arrestohet në Rinas burrelsi i dënuar me rreth 5 vite burgim për armë dhe municione

Shqiperi

Gazeta Express

04/07/2025 17:06

Një person i shpallur në kërkim dhe i dënuar me rreth pesë vite burgim nga drejtësia për mbajtje dhe prodhim të armëve, është kapur teksa kthehej në Shqipëri nëpërmjet aeroportit të Rinasit në Tiranë, për llogari të Policisë së Lezhës.

Specialistët e Seksionit për Hetimin e Trafiqeve të Paligjshme, njoftuan sot (4 korrik) se në zbatim të vendimit të Gjykatës së Lezhës, ndaluan 37-vjeçarin B. B., banues në Burrel.

“I shpalluri në kërkim është dënuar me 4 vjet e 8 muaj burgim, për veprën penale “mbajtja pa leje dhe prodhimi i armëve, armëve shpërthyese dhe municionit”, bëri me dije policia vendore.

I kërkuari u kap nga shërbimet e Policisë Kufitare të Rinasit, në hyrje të Shqipërisë dhe iu dorëzua autoriteteve policore të Lezhës për veprime të tjera dhe procedurat e vuajtjes së dënimit.