Personat me aftësi të kufizuara s'i morën pensionet e korrikut - Gazeta Express

Lajme

Gazeta Express

06/08/2020 10:59

Personat me aftësi të kufizuara s’i morën pensionet e korrikut

Lajme

Gazeta Express

06/08/2020 10:59

Drejtori i HANDIKOS, Afrim Maliqi, ka bërë të ditur se shumë personave me aftësi të kufizuar dhe familjarëve e tyre u janë ndërprerë pensionet shtetërore për muajin e fundit.

E gjithë kjo ka ndodhur për shkak të skadimit të afatit kohor të shfrytëzimit të këtij pensioni.

Ndonëse, drejtori Maliqi tash e një javë ka shprehur këtë shqetësim, ende nuk i është përgjigjur Ministria e Punëve dhe Mirëqenies Shoqërore.

“Ende nuk kemi marrë përgjigje për ndalesën e pensioneve përpos që këto ndalesa së pari janë për shkak se u kanë skaduar afatet, ndërsa ata kanë thëne se së shpejti do të vendosin se si do veprojnë.

Ndërsa ne kemi kërkuar që t’iu vazhdohen në forma tjera por gjithashtu edhe atyre që kanë marrë pensione 75 dhe 100 euro t’u vazhdohen edhe më tutje e jo vetëm si për tre muaj”, tha Maliqi.

Mirëpo, nga MPMS, për IndeksOnline, kanë treguar se shfrytëzuesit e këtyre pensioneve duhet t’i nënshtrohen procesit të rivlerësimit.

Sipas tyre, komisioni ka filluar ekzaminimin e lëndëve dhe pritet që brenda muajit gusht personat me aftësi të kufizuar t’i marrin pagesat e tyre shtetërore.

“Ndërprerja e pensioneve nga Skema e Pensioneve për Persona me Aftësi të Kufizuara, është bërë për ata përfitues që u ka skaduar afati i kohëzgjatjes së shfrytëzimit të këtij pensioni.

Këta shfrytëzues i nënshtrohen procesit të rivlerësimit nga ana e komisionit mjekësor, komision ky i cili edhe pse në kushte e rrethana tejet të vështirësuara për shkak të pandemisë, ka filluar ekzaminimin e lëndëve që presin për rivlerësim nga kjo skemë që nga fillimi i muajit gusht 2020.

Besojmë që brenda muajit gusht të gjithë ata persona që i plotësojnë kriteret do të kthehen në pagesë”, kanë thënë nga MPMS për IndeksOnline.

Kurse, lidhur me kërkesën e Maliqit që t’u vazhdohen pagesat shtesë të gjithë atyre personave që kanë marrë të njëjtën për tre muaj, nga ky institucion nuk kanë dhënë ndonjë përgjigje.