Përplasje e hapur? Saudi Pro League reagon pas protestës së Ronaldos

Sport

Gazeta Express

05/02/2026 23:13

Saudi Pro League ka publikuar një deklaratë zyrtare në lidhje me reagimin dhe protestën e fundit të Cristiano Ronaldos, duke theksuar se liga funksionon mbi parimin e pavarësisë së plotë të klubeve dhe barazisë së rregullave për të gjithë.

Në reagim, drejtuesit e ligës sqarojnë se çdo klub ka bordin, drejtuesit dhe strategjinë e vet sportive, ndërsa vendimet për transferime dhe shpenzime merren në mënyrë të pavarur, brenda një kornize financiare që synon qëndrueshmëri dhe balancë konkurruese.

“Cristiano Ronaldo ka qenë plotësisht i përfshirë me Al Nassr që nga ardhja e tij dhe ka luajtur rol të rëndësishëm në rritjen e klubit. Ai dëshiron të fitojë, si çdo sportist elitar, por asnjë individ – sado i rëndësishëm – nuk merr vendime përtej klubit të tij,” thuhet në deklaratë.

Saudi Pro League thekson se aktivitetet e fundit në tregun e transferimeve dëshmojnë qartë këtë pavarësi, pasi klubet kanë ndjekur strategji të ndryshme sipas vizionit të tyre.

Gjithashtu, liga nënvizon se gara për titull mbetet e hapur, me diferenca të vogla mes katër skuadrave të para, duke e cilësuar këtë si provë se sistemi aktual po funksionon siç duhet.

“Fokusi mbetet te futbolli, aty ku i takon – në fushë – dhe në ndërtimin e një gare të besueshme dhe konkurruese për lojtarët dhe tifozët,” përfundon deklarata. /GazetaExpress