Partitë me preferenca të ndryshme për datën e zgjedhjeve pas takimit te Osmani

Lajme

Gazeta Express

20/11/2025 11:42

Ka përfunduar takimi në Presidencë mes presidentes Vjosa Osmani dhe liderëve partiakë për caktimin e datës së zgjedhjeve.

Kryetari i Guxo, Faton Peci, tha se kanë pasë qëndrime të ndryshme rreth datës së zgjedhjeve.

“Pat diskutime të ndryshme rreth asaj se kur është opsioni më optimal dhe më i favorshëm për qytetarët e Republikës së Kosovës. Si Guxo kemi mbrojtur qëndrimin mes datës 21 dhjetor dhe 28 dhjetor, ne kemi preferuar datën 28” .

Kjo datë u përfol si e favorshme për shkak të ardhjes së mërgatës për shkak të festave të fundvitit, por Peci pretendoi se arsyet pse e kanë kërkuar këtë datë janë “të thjeshta”.

“Për shkak se KQZ ende nuk ka certifikuar rezultatin e zgjedhjeve lokale, për shkak të kemi kohë për përgatitje edhe të KQZ-së edhe të partive politike, por edhe për nevojën e organizimit më të mirë edhe të ambasadave dhe konsullatave në BE dhe përtej, SHBA. Ky ishte propozimi ynë. Ne mendojmë se 28 dhjetori është më e favorshmja, për qytetarin, për mërgatën, për një menaxhim më të mirë”.

Ndërkaq, kreu i AAK-së, Ramush Haradinaj, pasi njoftoi se sot është nënshkruar dekreti për shpërndarjen e Kuvendit të Kosovës, tha se data që ata preferuan ishte 21 dhjetori.

Po ashtu, edhe kryetari i PDK-së, Bedri Hamza, tha se data që kërkuan për zgjedhje ishte data 21 dhjetor./Express/