Përfundon numërimi i votave preferenciale në qarkun e Tiranës, kandidatët e PD dhe PS që marrin mandatin

Shqiperi

Gazeta Express

20/05/2025 12:21

Ka përfunduar numërimi i votave preferenciale të diasporës për qarkun e Tiranës, duke vulosur edhe emrat përfundimtarë që do të përfaqësojnë këtë qark në Kuvendin e Shqipërisë. Mes një gare të ngushtë brenda Partisë Socialiste për mandatin e shtatë të listës së hapur, fituese doli Olta Xhaçka, e cila arriti të marrë më shumë vota se Blerina Gjylameti.

Në garën mes kandidatëve meshkuj, Orlando Rakipi siguroi më shumë vota preferenciale se Xhemal Qefalia, duke i zënë vendin në Kuvend, ndonëse të dy ishin pjesë e shtatëses fituese. Zbatimi i kuotës gjinore sipas Kodit Zgjedhor bëri që nga dy emra të PS-së – një burrë dhe një grua – vetëm një të siguronte mandatin përkatës, në varësi të rezultatit.

Partia Socialiste ka arritur të fitojë 19 mandate në total në qarkun e Tiranës – 12 nga lista e mbyllur dhe 7 nga lista e hapur. Blendi Gonxhja rezultoi kandidati më i votuar në listën e hapur për këtë qark, i ndjekur nga Erion Braçe.

Lista e plotë e kandidatëve të PS që do të jenë pjesë e Kuvendit për qarkun Tiranë:

• Edi Rama
• Ogerta Manastirliu
• Elisa Spiropali
• Lindita Nikolla
• Taulant Balla
• Adea Pirdeni
• Albana Koçiu
• Igli Hasani
• Delina Ibrahimaj
• Ilva Gjuzi
• Iris Luarasi
• Erion Malaj
• Blendi Gonxhja
• Erion Braçe
• Ervin Hoxha
• Fatmir Xhafaj
• Orlando Rakipi
• Anila Denaj
• Olta Xhaçka

Ndërkohë, në kampin opozitar, përfaqësimi nga lista e hapur për PD-ASHM në Tiranë u reduktua vetëm në një mandat. Në garën mes Jorida Tabakut dhe Ilir Alimehmetit, fituese doli Tabaku, e cila i bashkohet 12 kandidatëve që u zgjodhën nga lista e mbyllur.

Lista e kandidatëve të PD që hyjnë në Kuvend nga qarku Tiranë:

• Sali Berisha
• Flamur Noka
• Albana Vokshi
• Belind Këlliçi
• Tedi Blushi
• Jozefina Topalli
• Fatmir Mediu
• Edi Paloka
• Erisa Xhixho
• Mesila Doda
• Klevis Balliu
• Besart Xhaferi
• Jorida Tabaku

Jashtë Kuvendit kanë mbetur Ilir Meta (PL) dhe Shpëtim Idrizi (PDIU), të cilët garuan në listën e hapur, por nuk arritën të siguronin mbështetjen e nevojshme për mandat.