Për shkak të temperaturave të larta, rezervistët e Dortmundit nuk dolën në fushë për ta parë ndeshjen

Futboll

Gazeta Express

22/06/2025 11:00

Trajneri i Borussia Dortmundit, Niko Kovaç, ka komentuar me ironi kushtet ekstreme klimatike në të cilat u zhvillua ndeshja ndaj Mamelodi Sundowns në Cincinnati, e vlefshme për Kupën e Botës për Klube.

“Po djersitesha sikur sapo kisha dalë nga sauna,” u shpreh ai pas fitores në temperaturat që arrinin 32°C.

Për të shmangur nxehtësinë, futbollistët rezervë të Dortmundit ndoqën pjesën e parë nga dhoma e zhveshjes, ndërsa në pjesën e dytë qëndruan në bankinë nën çadra dielli – një veprim i pazakontë, por i arsyeshëm për kushtet ekstreme. “Asnjëherë nuk e kemi parë këtë më parë, por në këtë vapë, është plotësisht e kuptueshme,” shkroi klubi në platformën X.

Kushtet ekstreme të motit vazhdojnë të ndikojnë në rrjedhën e turneut. Të premten u shty një tjetër ndeshje për shkak të stuhive me rrufe, ndërkohë që një valë e madhe të nxehti pritet javën e ardhshme.

Për shkak të shirave dhe stuhive të fuqishme në Orlando, pjesa e dytë e ndeshjes mes Benfikës dhe Auckland City u nis me më shumë se dy orë vonesë. Edhe takimi mes Mamelodi Sundowns dhe Ulsan HD në të njëjtin qytet u shty për mbi një orë.