Këtë vikend do të zhvillohet xhiroja e tetë e Superligës në basketboll dhe do të ketë ndeshje shumë interesante.
Kryendeshja do të zhvillohet në palestrën “Karagaçi” aty ku Peja e pret Sigal Prishtinën.
Të dy ekipet janë në dy pozitat e para në tabelë. Pejanët nuk dinë për humbje këtë edicion, nga shtatë ndeshje, kanë shtatë fitore, kurse prishtinasit kanë fituar dy sfidat e fundit.
Trepça kërkon të kthehet tek triumfi, pas tri humbjeve rresht. Xehetarët do të paraqiten me trajnerin e ri në Prizren ndaj Pontes.
Përballjen e parë, mitrovicasit e kishin fituar tejet lehtë, por e tillë nuk pritet të jetë këtë vikend.
Një pikë është dallimi mes tyre, me Trepçën si të tretën e prizrenasit si të katërtit.
Takim tejet interesant do të luhet edhe në Suharekë, Golden Eagle Ylli e pret Rahovecin, ndeshje e rivalëve.
Pas një starti të dobët të sezonit, Ylli është këndellur, duke marrë tri fitore rresht, kurse vreshtarët nuk dinë se çfarë është fitorja tash e gjashtë xhiro.
Rahoveci e mbyll renditjen, kurse Ylli ka kaluar në vendin e gjashtë.
Ballafaqimi i fundit është ai mes Vëllaznimit e Bashkimit. Gjakovarët hyjnë në ndeshje pas trilerit të fituar ndaj Trepçës, vikendin e kaluar, kurse prizrenasit nuk kanë fituar që tri xhiro.
Të kuqtë e Gjakovës, janë të pestit, kurse portokallinjt e Prizrenit të parafundit. /Gazeta Express/