PDK-ja e bojkoton Vjosa Osmanin pasi zhvendosi fotografinë e Thaçit nga zyra

Gazeta Express

06/02/2020 11:33

Partia Demokratike e Kosovës ka vendosur ta bojkotojë mbledhjen e Kryesisë së Kuvendit pasi që kryetarja e Kuvendit të Republikës së Kosovës, Vjosa Osmani, ka zhvendosur fotografinë e Thaçit nga zyra e saj në Kuvend.

Një gjë të tillë e ka thënë shefi i Grupit Parlamentar të PDK-së, Bedri Hamza. Sipas tij, inspirim duhet të gjendet në hapësira private dhe se institucionet zyrtare janë të rregulluara me ligj.

Hamza, gjithashtu, ka thënë se Kadri Veseli gjatë kohës sa ka qenë kryetar i Kuvendit e ka trajtuar me kujdes fotografinë e ish-presidentit Rugova.

“Unë e kuptoj se njerëzit kanë nevojë të inspirohen, por për gjëra të tilla janë ambientet dhe hapësirat private. Në institucionet zyrtare janë të rregulluara me ligj. Fotografia e presidentit Rugova është në hapësirat e Kuvendit dhe gjatë udhëheqjes së Kuvendit nga kryetari i PDK-së, Kadri Veseli, është trajtuar me kujdes. Në situatën në të cilën ndodhemi tani, proceset të cilat janë përpara, vlerësojmë se duhet të ketë kohezion të brendshëm. Ne besojmë që opozita e ka vendin në Kuvend. Është mirë për vendin por është mirë edhe për pushtetin. Ndërsa veprimet e zonjës Osmani, opozitës ia pamundësojnë këtë dhe e largojnë nga institucioni. Pra, si rezultat i këtij veprimi të kundërligjshëm, ne si partia më e madhe opozitare, nuk do të marrim pjesë në mbledhjen e Kryesisë së Kuvendit”, ka thënë Hamza.

Ai tutje ka thënë se PDK-ja kërkon që fotografia zyrtare e Thaçit të trajtohet sipas ligjit dhe i kanë bërë thirrje Vjosa Osmanit të ndalojë veprimet, të cilat, sipas PDK-së, janë joligjore.

“Kërkojmë që fotografia zyrtare e presidentit të vendit z. Hashim Thaçi, të trajtohet sipas legjislacionit në fuqi, të kthehet në vendin e vet dhe zonja Osmani të ndalojë veprimet që nuk janë në përputhje me ligjin dhe të cilat e pamundësojnë opozitën të jetë në Institucione dhe të kontribuojë në rolin e saj që e ka të drejtë dhe obligim”, ka shtuar ish-ministri i Financave.

PDK-ja dhe partitë opozitare kanë bojkotuar edhe seancën kur është votuar Qeveria Kurti dhe, gjithashtu, edhe atë kur është zgjedhur Vjosa Osmani kryetar e Kuvendit.

Lidhur me largimin e fotografisë së Thaçit, ka folur edhe Vjosa Osmani e cila ka treguar se e ka zhvendosur në një hapësirë tjetër të Kuvendit. Ndërsa për fotografinë e Rugovës ka thënë se nga ai inspirohet. /Express/