Pas gati dy dekadash, Mozilla vendos të tërhiqet nga Pocket

Lajme

Gazeta Express

29/05/2025 10:18

Mozilla ka bërë të ditur se do të ndërpresë shërbimin e njohur Pocket më 8 korrik 2025, në kuadër të një riorientimi strategjik që synon t’u përshtatet më mirë zakoneve bashkëkohore të konsumimit të përmbajtjes në internet.

Përdoruesit do të kenë kohë deri më 8 tetor 2025 për të eksportuar të dhënat e tyre – përfshirë artikuj, video dhe përmbajtje të tjera të ruajtura – përpara se ato të fshihen përgjithmonë nga serverët e kompanisë. Abonentët me pagesë vjetore do të kompensohen me rimbursime të pjesshme, në përputhje me kohëzgjatjen e shërbimit të përdorur.

Pocket, i njohur fillimisht si Read It Later, u lançua në vitin 2007 dhe fitoi popullaritet si një vegël për ruajtjen e përmbajtjes për lexim të mëvonshëm. Mozilla e integroi atë në shfletuesin Firefox në vitin 2015 dhe e bleu plotësisht dy vite më vonë, në 2017. Megjithatë, me ndryshimin e mënyrës se si përdoruesit aksesojnë dhe konsumojnë përmbajtje, Pocket duket se ka humbur rolin që dikur kishte.

Buletini i përjavshëm “Pocket Hits” do të mbijetojë përkohësisht përmes një versioni të ri të quajtur “Ten Tabs”, por nuk do të publikojë më përmbajtje gjatë fundjavave.

Përveç Pocket, Mozilla ka vendosur të mbyllë edhe shërbimin Fakespot – një mjet që ndihmonte përdoruesit të identifikonin komentet e rreme në platformat e shitjeve online. Kompania ka deklaruar se vendimi erdhi si rezultat i vështirësive në mbajtjen e modelit të qëndrueshëm të biznesit për këtë shërbim.