Partey akuzohet për përdhunim dhe sulm seksual

Sport

Gazeta Express

04/07/2025 16:23

Ish-futbollisti i Arsenalit, Thomas Partey, është akuzuar për përdhunim nga Policia Metropolitane e Londrës.

Mesfushori i kombëtares së Ganës, 32 vjeç, është përballur me pesë akuza për përdhunim dhe një akuzë për sulm seksual.

“Shërbimi i Prokurorisë së Kurorës ka autorizuar Policinë Metropolitane të ngrejë akuza ndaj një burri pas dorëzimit të dosjes hetimore nga detektivët,” thuhet në deklaratën zyrtare të lëshuar të premten nga Policia Metropolitane.

Ngjarjet e raportuara kanë ndodhur midis viteve 2021–2022.

Akuzat përfshijnë tre gra të ndryshme: dy akuza për përdhunim lidhen me një grua, tre akuza të tjera për përdhunim lidhen me një të dytë, dhe një akuzë për sulm seksual me një grua të tretë.

Detektivi Superintendent Andy Furphy, i cili po udhëheq hetimet, deklaroi: “Prioriteti ynë mbetet ofrimi i mbështetjes për gratë që kanë dalë hapur. Ne i bëjmë thirrje kujtdo që është ndikuar nga ky rast, ose ka informacion, të kontaktojë me ekipin tonë. Mund të kontaktoni detektivët përmes emailit: [email protected]”

Jaswant Narwal, Kryeprokurore e Shërbimit të Kurorës për zonën London North, u shpreh:

“Sot kemi autorizuar ndjekjen penale ndaj Thomas Partey për disa akuza për përdhunim – pas shqyrtimit të kujdesshëm të një dosjeje të plotë me prova. Prokurorët tanë kanë bashkëpunuar ngushtë me oficerët e Policisë Metropolitane për të shqyrtuar provat dhe për të dhënë këshillat e duhura mbi akuzat e ngritura. Kujtojmë se procedurat penale janë aktive dhe i pandehuri ka të drejtë për një gjykim të drejtë. E dimë që kjo çështje do të ngjallë interes të madh publik, por është thelbësore që të mos ketë raportime, komente apo ndarje informacioni online që mund të ndikojnë negativisht në procesin gjyqësor.”

Partey pritet të paraqitet në Gjykatën e Magjistraturës së Westminster-it më 5 gusht (e martë).

Kontrata e tij me Arsenalin përfundoi më 30 qershor, pas një periudhe pesëvjeçare me klubin londinez.
Mesfushori iu bashkua Arsenalit nga Atletico Madridi në vitin 2020 për një shumë prej rreth 45.3 milionë £ dhe zhvilloi 167 paraqitje për klubin.

Gjatë sezonit të fundit në Premier League, ai u aktivizua në 35 ndeshje dhe shënoi katër gola, ndërsa Arsenali përfundoi në vendin e dytë./GazetaExpress/