Parlamenti Evropian diskuton sot për dhunën dhe autoritarizmin në Serbi – Opozita kërkon sanksione ndaj pushtetit të Vuçiqit

Lajme

Gazeta Express

09/09/2025 8:00

Parlamenti Evropian mblidhet sot në Strasburg, ku një nga temat kryesore të ditës është situata e përkeqësuar në Serbi. Në rendin e ditës ndodhet debati me titullin “Valë dhune dhe përdorimi i vazhdueshëm i forcës ndaj protestuesve në Serbi”, në të cilin marrin pjesë përfaqësues të Komisionit Evropian dhe Këshillit të BE-së.

Përveç debatit zyrtar, në ambientet e Parlamentit do të zhvillohen edhe diskutime të tjera anësore. Një prej tyre është paneli “Serbia: Demokracia në udhëkryq”, i organizuar nga tre grupe politike – Socialistët dhe Demokratët, të Gjelbrit. Po ashtu, Partia e Gjelbër Evropiane do të mbajë një konferencë për shtyp ku do të flitet për “autoritarizmin në rritje të presidentit Aleksandar Vuçiq dhe represionin ndaj protestuesve”.

Në Strasburg janë të pranishëm edhe përfaqësues të opozitës serbe – nga Partia e Lirisë dhe Drejtësisë, Fronti Gjelbër-Politik i Majtë, Lëvizja e Qytetarëve të Lirë dhe lideri i partisë Serbia Centar, Zdravko Ponosh. Ata paralajmëruan takime me eurodeputetë, ku do të kërkojnë vendosjen e sanksioneve të personalizuara ndaj drejtuesve të regjimit në Serbi.

Zdravko Ponosh deklaroi se presidenti serb Aleksandar Vuçiq nuk ka më asnjë ofertë serioze për Bashkimin Evropian – as litium, as stabilitet rajonal dhe as ndonjë vizion për zhvillim.

“Nëse Bashkimi Evropian mbetet një vëzhgues i heshtur, problemet në Serbi shumë shpejt do të bëhen probleme evropiane,” tha ai. Sipas Ponoš, zgjidhja është vendosja e sanksioneve ndaj krerëve të policisë të përfshirë në dhunën ndaj qytetarëve, por edhe ndaj politikanëve të lartë dhe familjarëve të tyre.

“Le të mos mundin më fëmijët e tyre të studiojnë në Berlin, ndërsa të rinjtë tanë rrihen në rrugët e Beogradit. Kjo është diçka që Evropa mund ta bëjë nëse dëshiron,” theksoi ai.

Ponosh u shpreh gjithashtu se Aleksandar Vuçiq nuk përfaqëson Serbinë dhe se nuk ka pse imazhi i vendit të vuajë nga deklaratat e tij ofenduese ndaj eurodeputetëve. Ai tha se në Bruksel po rritet gatishmëria për të dëgjuar zërin e opozitës dhe e cilësoi këtë si rezultat i presionit dhe dhunës në rritje ndaj qytetarëve.

“Vuçiq nuk meriton të trajtohet ndryshe nga Lukašenko – me ndryshimin që Lukašenko të paktën nuk pretendon se dëshiron të hyjë në BE,” tha ai.

Në një dokument të përgatitur për eurodeputetët thuhet se që nga viti 2012 Serbia është karakterizuar nga një përqendrim i madh pushteti në duart e presidentit dhe partisë në pushtet (SNS), kontroll mbi mediat dhe institucione të dobëta.

Dokumenti thekson polarizimin e thellë politik dhe pakënaqësinë në rritje të qytetarëve, ndërsa kujton se Parlamenti Evropian ka miratuar tashmë disa rezoluta – një në shkurt për zgjedhjet e diskutueshme të dhjetorit dhe një tjetër në maj, ku i kërkohet Serbisë të përshpejtojë reformat në fushën e medias, drejtësisë dhe të drejtave themelore.