Parada planetare: Gjashtë planete rreshtohen në qiellin e natës

Mistere

Gazeta Express

02/03/2026 22:13

Astronomët amatorë dhe të apasionuarit pas yjeve kanë një surprizë këtë mbrëmje: një “paradë planetare” e rrallë ku do të shihen gjashtë planeta në qiellin e natës.

Sot do të jenë të dukshëm Merkuri, Venusi, Jupiteri, Saturni, Urani dhe Neptuni. Katër prej tyre mund të shihen me sy të lirë, ndërsa për të parë të gjithë gjashtë planetët, do t’ju duhet një teleskop ose dylbi e fuqishme për të kapur Uranin dhe Neptunin.

Të gjithë planetët orbitojnë në të njëjtën planet të ekliptikës, duke bërë të mundur që herë pas here të rreshtohen në një mënyrë që mund të dallohen nga Toka.

Dr. David Armstrong, profesor asociuar i astronomisë në Universitetin e Warwick, thotë: “Shanset për të parë katër planeta të ndritshëm me sy të lirë ndodhin mesatarisht çdo disa vite, kështu që nuk është një ngjarje njëherë në jetë. Por planetët janë më të dukshëm menjëherë pas perëndimit të diellit, dhe kjo është një nga mundësitë më të mira për disa vite.”

Si t’i shihni planetët

Paradë planetare ka nisur që në fillim të muajit, por deri tani planetë si Venusi dhe Merkuri kanë qenë shumë të ulët dhe perëndimi i diellit i ka bërë të vështirë për t’u dalluar. Kjo e bën sot dhe nesër mbrëma rastin më të mirë për të parë të gjashtë planetët të shtrirë në qiell.

Merkuri do të duket pranë horizontit perëndimor, pas perëndimit të diellit.

Venusi, gjithashtu i dukshëm me sy të lirë, do të jetë afër dhe pak majtas Merkuri. Të dy planetët janë aq afër sa nuk mund të shihni njërin pa tjetrin.

Saturni do të shfaqet pak më lart, i dallueshëm për shkak të shkëlqimit të tij të verdhë.

Jupiteri do të jetë më lart dhe më i lehtë për t’u dalluar, duke shkëlqyer si pika më e ndritshme.

Urani dhe Neptuni kërkojnë teleskop ose dylbi; Urani pranë grumbullit të yjeve Plejade në konstelacionin e Demit, dhe Neptuni afër Saturnit.

Dr. Armstrong sugjeron të gjeni një vend me horizont të hapur perëndimor dhe të shmangni ndriçimin e qytetit për t’i parë më mirë. Kujdesi me teleskopin është i domosdoshëm, sidomos për t’i parë planetët pranë diellit, pasi një shikim i drejtpërdrejtë mund të shkaktojë dëmtime serioze në sy.

Mitet rreth paradave planetare

Shumë njerëz mendojnë se rreshtimi i planetëve mund të shkaktojë katastrofa natyrore ose të ndryshojë tërheqjen gravitacionale të Tokës. Sipas Dr. Shyam Balaji nga King’s College London: “Këto rreshtime janë thjesht rastësi gjeometrike dhe nuk kanë ndikim fizik të njohur mbi Tokën. Tërheqja e tyre gravitacionale është e parëndësishme krahasuar me atë të Hënës ose Diellit.”

Pra, mbrëmjen e sotme mund të shijoni një spektakël të rrallë në qiell pa pasur frikë nga pasojat, dhe katër planetët më të dukshëm mund të admirohen thjesht me sy të lirë. /GazetaExpress/