Pamjet që s'i duam: Fillon ora policore, Milano duket qytet i shkretë natën - Gazeta Express

Pamjet që s’i duam: Fillon ora policore, Milano duket qytet i shkretë natën

Gazeta Express

24/10/2020 13:00

Rrugët e qytetit të famshëm italian, Milano, mbetën të zbrazëta gjatë natës, kur hyri në fuqi ora policore 60 minuta para mesnatës.

Shtatë muaj pas rrugëve dhe shesheve boshe, që u bënë simbol i valës së parë të pandemisë, shshi para Katedrales Duomo u zbraz përsëri pas hyrjes në fuqi të masave të reja, shkruan Daily mail, transmeton Gazeta Express.

Lombarida, e cila ishte rajoni më i prekur nga koronavirusi në pranverë, përsëri ka më së shumti raste në Itali me mbi 4.100 të infektuar për një ditë, që ishin pjesë e rekordit prej 16.079 rasteve në tërë vendin.

Rajoni verior gjithashtu e ka edhe numrin më të madh të pacientëve që ndodhen nën kujdes intensiv, prandaj udhëheqësit lokalë i kanë ndaluar lëvizjet jourgjente nga ora 23 deri në 5 të mëngjesit.

Urdhri për orë policore u nënshkrua nga presidenti rajonal, Attilio Fontana, dhe do të qëndrojë në fuqi së paku deri më 13 nëntor.

Përpos orës policore, në Lombardi do të mbyllen shkollat e mesme, mësimi do të zhvillohet nga largësia, ndërsa qendrat tregtare do të jenë të mbyllura gjatë ditëve të fundjavës.

Pas izolimit të plotë në mars, kryeministri Giuseppe Conte ka thënë se dëshiron ta shmangë përsëritjen e atij skenari, por i ka paralajmëruar njerëzit që t’i shmangin lëvizjet e panevojshme.

Italia ishte vendi më i prekur nga koronavirusi në Evropë në javët e para të përhapjes, duke shënuar mbi 700 viktima në ditë.