Palestinezët refuzojnë marrëveshjen mes Izraelit dhe Emirateve të Bashkuara Arabe - Gazeta Express

Palestinezët refuzojnë marrëveshjen mes Izraelit dhe Emirateve të Bashkuara Arabe

Lajme

Gazeta Express

14/08/2020 19:42

Të gjitha fraksionet palestineze, përfshirë edhe Hamasi dhe Xhihadi Islamik, lëshuan deklarata ku dënuan marrëveshjen mes Izraelit dhe Emirateve të Bashkuara Arabe.

Marrëveshja në mes të këtyre dy shteteve zoton normalizimin e plotë të marrëdhënieve në fushat e sigurisë, turizmit, teknologjisë dhe tregtisë, në shkëmbim me vazhdimin e planit të aneksimit të Bregut Perëndimor nga ana e Izraelit, shkruan Al Jazeera.

Edhe udhëheqësit palestinezë edhe populli u kapën në befasi kur u bë lajmërimi të enjten. Bregu perëndimor është vendi ku palestinezët dëshirojnë të themelojnë shtetin e tyre, transmeton KOHA.

“Ne absolutisht nuk kemi pasur dijeni për këtë marrëveshje”, tha Ahmed Majdajani, ministri për marrëdhënie sociale i Autoritetit Palestinez. “Koha dhe shpejtësia me të cilën u arrit kjo marrëveshje ishte befasuese, posaçërisht në një moment kritik për çështjen Palestineze”.

Ish ministri i Autoritetit Palestinez Munib al-Masri tha se Sheikh Zayed bin Sultan al Nayhan, i cili udhëhoqi Abu Dabin për më shumë se 30 vite para se të vdiste në vitin 2004, ka qenë gjithmonë përkrahës i madh i palestinezëve.

“Sheiku i ndjerë ka qenë si vëlla imi, e di sa ka qenë krenar për përkrahjen ndaj Palestinës. Kurrë nuk kam paramenduar se do të vjen dita kur Emiratet do të shesin Palestinën vetëm për normalitet”, tha Al Masri. “Është e turpshme, ende nuk mund ta besoj”.

Zyrtarët tjerë Palestinezë thanë që edhe pse lajmi erdh papritur, nuk ishte edhe ndonjë befasi.

“Nuk u befasuam sepse ushtria Emirate kurrë nuk ka qenë tek kufijtë, e gatshme për të luftuar kundër Izraelit” tha Mustafa al-Barghouti, anëtar i parlamentit.

Udhëheqësit palestinezë thanë se kjo marrëveshje ishte “një dhuratë falas Izraelit” dhe është bërë për të ndihmuar Trumpin në rizgjedhje, njëjtë si kryeministrin e Izraelit Benjamin Netanyahun. Ata po e quajnë këtë lëvizje si thikë në shpinë.

Pavarësisht dëshpërimit, palestinezët thonë se lajmi i së enjtes nuk do të ndalë vendosmërinë e tyre që ti japin fund okupimit nga Izraeli.