Pak ditë para derbit të Romës, Mourinho “godet” Taren: Ndoshta ai është problemi i Lazios

Sport

Gazeta Express

04/11/2022 17:09

Derbi i Romës fillon të dielën, por përplasja mes Romës dhe Lazios tashmë ka filluar jashtë fushës.

Jose Mourinho ka komentuar deklaratën e shqiptarit, Igli Tare, i cili e quajti Ligën e Konferencës “kompeticion i dështakëve”, transmeton Gazeta Express.

Roma dhe Lazio do të takohen të dielën, në stadiumin “Olimpico” nga ora 18:00, por tashmë “loja” ka filluar jashtë fushës.

Lazio ra në Ligën e Konferencës pasi përfundoi në vendin e tretë në Grupin F të Ligës së Evropës. Rezultati i tyre i dobët në Evropë i ka bërë njerëzit të flasin veçanërisht pasi drejtori sportiv, Igli Tare, e quajti Ligën e Konferencës si një “kompeticion të dështakëve” javën e kaluar.

Roma fitoi Ligën e Konferencës në sezonin e kaluar, kurse këtë sezon ka kaluar fazën e grupeve në Ligën e Evropës duke përfunduar e dyta në Grupin C.

Pas fitores së mbrëmshme ndaj Ludogorets në “Olimpico”, Mourinho tha se Lazio është favorit për të fituar Ligën e Konferencës, por gjithashtu i dërgoi një mesazh të qartë drejtorit të tyre.

“Sinqerisht, unë mendoj se ata janë favoritët, si West Ham, Fiorentina apo Leicester vitin e kaluar” tha trajneri portugez.

“Nuk kam parë se kush u eliminua [nga Liga e Evropës], por për mua, ata janë favorit tani. Ata kanë trajnerin, lojtarët dhe ekipin për ta bërë këtë. Ndoshta problemi është që zoti Tare nuk dëshiron [të fitojë] sepse nuk i pëlqen ky kompeticion”, shtoi Mourinho. /Gazeta Express/