Pa zgjidhjen e liberalizimit të vizave, s’ka kuptim as vazhdimi i dialogut

Gazeta Express

10/07/2020 7:32

Dialogu mes Kosovës dhe Serbisë me ndërmjetësimin e BE-së pritet të rifillojë me 12 korrik.

Bashkimi Evropian si ndërmjetësues i dialogut Kosovë-Serbi, ka paralajmëruar se më 12 korrik përfaqësuesit politikë të Prishtinës dhe Beogradit do të takohen në Bruksel për të rifilluar dialogun.

Mirëpo, përveç zvarritjes së këtij procesi, Bashkimi Evropian ka dështuar edhe në çështjen e liberalizimit të vizave për Kosovën.

Profesori universitar dhe njohësi i çështjeve integruese, Arben Fetoshi, ka thënë për lajmi.net, se pa zgjidhjen e çështjes së liberalizmit të vizave, as vazhdimi i dialogut nuk ka kuptim.

Sipas Fetoshit, përfshirja e Francës dhe Gjermanisë në këtë proces, jep shpresë që çështja e liberalizimit të vizave të përfundojë shpejtë.

“Në qoftë se BE-ja nuk e procedon çështjen e liberalizimit të vizave në Këshill, nuk do të ketë kredibilitet në rolin udhëheqës të dialogut Kosovë-Serbi. Angazhimi i Gjermanisë dhe Francës si lehtësues në këtë proces, rekomandimi i kahershëm i Komisionit Evropian e miratimi në Parlamentin Evropian, si dhe kërkesat së fundmi të eurodeputetëve drejtuar Gjermanisë si kryesuese e radhës së Këshillit dhe Francës e Holandës, mendoj se janë shenja për një vendimmarrje pa zvarritje të tjera dhe fundi i vitit është afat real për fillimin e lëvizjes së lirë të kosovarëve. Proceduralisht është e arritshme në qoftë se ekziston vullneti i shteteve anëtare, megjithëse ka kohë që BE-ja e ka përdorur këtë çështje si mjet presioni ndaj Kosovës”, ka thënë Fetoshi për lajmi.net.

Gjatë së mërkurës, i dërguari special i presidentit amerikan Donald Trump për dialogun Kosovë-Serbi, Richard Grenell, duke i dhënë mbështetjen amerikane BE-së për rifillimin e dialogut, ka kërkuar që në takimin e 10 korrikut të përfundohet çështja e liberalizimit të vizave.

E në lidhje me këtë, profesori universitar Arben Fetoshi, ka bërë të ditur se duke e parë presionin e SHBA-ve, ka shumë gjasë që liberalizimi të futet në agjendën e Këshillit të Ministrave për miratim brenda këtij viti.

“Sidoqoftë, bazuar në rrethanat aktuale që kanë të bëjnë me dialogun, nevojën e BE-së për kredibilitet në rolin e saj udhëheqës dhe në presionin e vazhdueshëm të SHBA-ve, jam optimist se liberalizimi do të futet në agjendën e Këshillit të Ministrave për miratim brenda këtij viti”, u shpreh Fetoshi.

Theksojmë se që nga 1 korriku kur Gjermania e ka marrë presidencën e BE-së për gjashtë muaj, zyrtarët kosovarë janë shprehur optimist se do të përfundojë liberalizmi i vizave këtë vit.

Mirëpo, edhe gjatë së martës më shumë se 40 deputetë të Parlamentit Evropian u kanë shkruar letra presidentit të Francës, Emanuel Macron dhe kryeministrit të Holandës, Mark Rutte, përmes së cilave kërkojnë që BE-ja të liberalizojë vizat me Kosovën.

Këta dy liderë të vendeve anëtare të BE-së, konsiderohen si kundërshtarët më të fuqishëm të liberalizimit të vizave me Kosovës, sepse vendet e tyre nuk e kanë mbështetur një vendim të tillë në Këshillin e BE-së.

“BE-ja është duke u përpjekur që të luaj rolin e një ndërmjetësi të paanshëm në dialogun mes Kosovës dhe Serbisë. Megjithatë, kjo nuk do të jetë e mundur nëse ne vazhdojmë t’i trajtojmë qytetarët e këtyre dy vendeve në mënyra të ndryshme, duke u ofruar udhëtim të lirë qytetarëve të Serbisë dhe duke u vendosur pengesa për të gëzuar të njëjtën mundësi atyre të Kosovës”, thuhet në këtë letër.

Kjo letër është bërë publike pikërisht në ditën kur kryeministri i Kosovës, Avdullah Hoti, është takuar në Paris me presidentin Emmanuel Macron, dhe kur pritet rifillimi i dialogut mes Kosovës dhe Serbisë më 12 korrik në Bruksel.