Osmani prezantoi paketë masash për mbështetjen e grave

Maqedoni

Gazeta Express

30/08/2025 15:46

Nën moton “Gratë e sjellin ndryshimin”, sot në Çair u prezantua një paketë gjithëpërfshirëse masash për mbështetjen e grave, me të cilën hapet një epokë e re e kujdesit real dhe përkrahjes për heroinat e përditshmërisë.

Në fjalën e tij, Osmani theksoi se Fondacioni “Dora e Çairit” do të jetë shtylla kryesore e këtij paketi, i cili synon ndihmën financiare dhe sociale për nënat e vetme, gratë në kategori të cenueshme dhe për të gjitha ato ndaj të cilave komuna për një kohë të gjatë u kishte kthyer shpinën.
“Ky është simbol i kujdesit real, e jo i solidaritetit deklarativ,” tha Osmani.

Masat kryesore të paketës “Gratë e sjellin ndryshimin”:

• Fondacioni “Dora e Çairit”, kujdes dhe mbështetje reale për nënat e vetme dhe gratë në kategori të cenueshme.
• Qendër trajnimi zejtarisht me certifikata për fitim i aftësive të reja dhe kualifikimeve profesionale të njohura.
• Mbështetje financiare për mikro-biznese si ndihmë fillestare për gratë sipërmarrëse.
• Bashkëpunim me çarshinë dhe shkollat për transmetimin e dijes dhe vlerave tek gjeneratat e reja.
• Panaire të punimeve dorës dhe produkteve tradicionale për promovimin e kreativitetit të grave katër herë në vit.
• Qendra dhe Klubi i grave të Çairit hapësirë për mentorim, trajnime dhe nisma të përbashkëta.
• Kurse, punëtori dhe mikro-grante për gjuhë të huaja, edukim juridik dhe riprodhues, arsim financiar dhe mundësi të reja për punësim.

“Dua ta shoh gruan e Çairit si ekonomikisht të pavarur, shoqërisht me ndikim dhe politikisht me zë. Dua një komunë që nuk do të frikësohet nga fuqia e gruas. Ndryshimi fillon këtu. Dhe këtë ndryshim do ta udhëheqin gratë,” theksoi Osmani.