OKB bën thirrje për hetime mbi vrasjet pranë vendit të shpërndarjes së ndihmave në Gaza

Lajme

Gazeta Express

02/06/2025 23:27

Sekretari i përgjithshëm i OKB-së ka bërë thirrje për një hetim të pavarur për vrasjen e palestinezëve pranë një qendre shpërndarjeje ndihmash në Gaza të dielën, mes raporteve të diskutueshme se forcat izraelite kishin hapur zjarr.

Dëshmitarët raportuan se u qëlluan ndërsa prisnin ushqim nga qendra në Rafah e drejtuar nga Fondacioni Humanitar i Gazës (GHF) i mbështetur nga SHBA-të dhe Izraeli.

Kryqi i Kuq tha se spitali i tij mori 179 viktima, 21 prej të cilëve ishin të vdekur. Agjencia e Mbrojtjes Civile e drejtuar nga Hamasi e vlerësoi numrin e të vdekurve në 31.

Të dielën, ushtria izraelite mohoi se trupat e saj qëlluan ndaj civilëve pranë ose brenda vendit dhe tha se raportet në këtë drejtim ishin të rreme.

GHF tha se raportet ishin “trillime të plota” dhe se ende nuk kishte parë prova për një sulm në ose afër objektit të saj.

Izraeli nuk lejon organizatat ndërkombëtare të lajmeve, përfshirë BBC-në, në Gaza, duke e bërë të vështirë verifikimin e asaj që po ndodh në territor, siç rapoton mediumi.

Sekretari i Përgjithshëm i OKB-së, Guterres, tha në një deklaratë të hënën: “Jam i tmerruar nga raportet për palestinezët e vrarë dhe të plagosur ndërsa kërkonin ndihmë në Gaza dje.

“Bëj thirrje për një hetim të menjëhershëm dhe të pavarur për këto ngjarje dhe që autorët të mbahen përgjegjës.”

Ministria e Jashtme e Izraelit u përgjigj duke i quajtur komentet e tij një “turp” në një postim në X dhe e kritikoi atë për mospërmendjen e Hamasit, ka raportuar BBC, transmeton Gazeta Express.