Llapi ka konfirmuar se nuk e ka asnjë të prekur më koronavirus në klub, pasi të gjitha testet e bëra sot ndaj futbollistëve dhe stafit të klubit kanë dalë negative.
Lojtarët dhe stafi i klubit nga Podujeva u testuan sot gjatë ditës, ndërsa rezultatet e ardhura këtë mbrëmje tregojnë se nuk ka asnjë te prekur me koronavirus në skuadër, raporton Gazeta Express.
Lajmi është konfirmuar nga vetë klubi përmes një postimi në rrjetet sociale.
Llapi ishte klubi i parë i Ipko Superligës së Kosovës, që u kthye në stërvitje pas lehtësimit të masave ndaj koronavirusit këtë muaj.
Lojtarët e Superligës nuk u testuan deri gati një javë pas rifillimit të stërvitjeve dhe vetëm pasi lojtari i Dritës, Izair Emini rezultoi pozitiv me Covid-19 javën e kaluar.
“Futbollistët, stafi teknik dhe administrata e KF Llapit gjatë ditës së martë kanë përfunduar testimet për COVID-19. Rezultatet e pranuara nga Instituti Kombëtar i Shëndetësisë̈ Publike në Kosovë rezultojnë të jenë NEGATIVE për të gjithë të testuarit, kështu që asnjë pjesëtar i klubit nuk rezulton i prekur me këtë virus”, shkruhet në njoftimin e Llapit në Facebook.
Llapi pritet të luftojë për një vend në garat evropiane sezonin e ardhshëm, kur kampionati në Ipko Superligë të rifillojë në fillim të muajit të ardhshëm.
Skuadra e Tahir Batatinës renditet në vendin e gjashtë me 34 pikë, gjashtë pikë larg vendit të tretë, i cili dërgon në kualifikime për pjesëmarrje në Ligën e Evropës. /Gazeta Express/