Nuk ka klube të interesuara për Milot Rashicën, thotë zyrtari i Werderit

Futboll

Gazeta Express

04/05/2021 14:09

Duket se Milot Rashica do ta vazhdojë karrierën në Werder Bremen edhe përtej këtij sezoni, në mungesë të interesimit për të nga klubet e tjera.

Rashicës – i cili i ka shënuar vetëm dy gola për klubin gjerman këtë sezon – i dështoi largimi i shumëdëshiruar nga Werderi në çastet e fundit të afatit kalimtar të verës së kaluar, raporton Gazeta Express.

Rashica kishte arritur marrëveshje me Bayer Leverkusenin dhe madje kishte udhëtuar me makinë drejt Rhineland për ta hedhur firmën. Por Werderi e prishi marrëveshjen sepse nuk e pranoi ujdinë e Leverkusenit, i cili ishte i gatshëm vetëm ta huazojë kosovarin pa detyrim blerjeje.

Që prej fundit të sezonit të kaluar, përfaqësuesi i Kosovës e ka pasur mendjen të gjejë një klub të ri me synim për të luajtur në Ligën e Kampionëve.

Por shefi i Werderit për Futboll dhe Vëzhgim të Talenteve, Clemens Fritz, e ka pranuar se për 24-vjeçarin mungon interesimi nga klubet e tjera.

I pyetur nëse ka klube të interesuara për kosovarin, Fritz tha: “Nuk kam asgjë për të raportuar për këtë”.

Rashica ka qenë pronë e lëndimeve të shumta këtë sezon, si pasojë e të cilave ai nuk ka pasur mundësi të vazhdojë t’i shfaqë aftësitë e veta, duke i bërë vetëm 23 paraqitje në të gjitha garat për klubin gjerman.

Vlera e Rashicës në treg ka rënë dukshëm, po ashtu, shkaku i pandemisë së koronavirusit dhe formës së dobët në sezonin e fundit.

Synimi i Werderit vazhdimisht ka qenë të përfitojë bujshëm nga shitja e tij, prandaj edhe Werderi nuk do të pranojë ta shesë pa pasur ofertë konktrete për të. /Gazeta Express/