Nuk ishte nata e sulmuesve në Champions, dy portierë e fitojnë çmimin “MVP”

Sport

Gazeta Express

07/04/2026 23:45

Ishte mbrëmja e mbrojtjeve dhe në veçanti e portierëve: çerekfinalet e Champions League konfirmojnë një tendencë shqetësuese.

Gjithnjë e më shpesh janë mbrojtjet ato që fitojnë, më shumë sesa loja spektakolare dhe golat, deri në pikën që në mbrëmjen e parë të dedikuar çerekfinaleve të Championsit, ishin dy portierë ata që e fituan çmimin e lojtarit më të mirë të ndeshjes (MVP).

Portieri i Arsenalit, David Raya, u shpall “Man of the Match” në çerekfinalen e luajtur në Lisbonë, shkruan “Gazeta Express”.

Komisioni teknik i UEFA-s e arsyetoi kështu zgjedhjen: “Ka ofruar një paraqitje të nivelit shumë të lartë. Ka qenë vendimtar për ta mbajtur portën të paprekur, duke u treguar gjithmonë vigjilent dhe i sigurt, si dhe duke e bërë një pritje që u bë një nga momentet kyçe të gjithë ndeshjes për Gunners”.

I shpallur “Lojtari i Ndeshjes” në duel me Real Madridin, Manuel Neuer e arriti sonte vendin e nëntë në renditjen e të gjitha kohërave për paraqitje në kompeticionet e klubeve të UEFA-s, duke u ngjitur në kuotën e 167 ndeshjeve, në të njëjtin nivel me legjenda si Gianluigi Buffon, Lionel Messi dhe shoku i skuadrës Thomas Müller.

Portierit gjerman tani i mungojnë vetëm dy paraqitje për të barazuar vendin e tetë, që mbahet nga Robert Lewandowski; në krye të kësaj renditjeje qëndron ende Cristiano Ronaldo me 197 paraqitje. /Gazeta Express