Një nga veprat më ikonike të muzikës klasike “Carmen” së shpejti në Prishtinë

Arte

Gazeta Express

14/07/2025 15:45

Opera e Kosovës do ta sjell në Prishtinë Operën ‘Carmen’ të George Bizet më 22 dhe 24 korrik në AMC Hall. Adoptuar nga novela e Prosper Mérimée, ‘Carmen’ është një nga veprat me ikonike të muzikës klasike për të cilën këto ditë janë bërë të ditur edhe emrat që do ta performojnë.

Vitaliy Bilyy në rolin e Escamilo

Baritoni ukrainas Vitaliy Bilyy ka interpretuar në disa nga skenat më prestigjioze të operas në botë, përfshirë Metropolitan Opera në Nju Jork, Opéra national de Paris, Wiener Staatsoper, Teatrin Bolshoi në Moskë, Bayerische Staatsoper në Mynih, Grand Théâtre de Genève, Teatro alla Scala në Milano, Oper Hamburg, San Francisco Opera dhe të tjera.

Diplomuar në Konservatorin e Odesës, ai ka fituar disa konkurse ndërkombëtare të rëndësishme, si Konkursi Elena Obraztsova në Shën Petersburg, Konkursi Francisco Viñas në Barcelonë dhe Konkursi Montserrat Caballé në Andorrë. Në vitin 2004 fitoi konkursin prestigjioz operistik Operalia.

Karrierën si solist e nisi në vitin 1997 me Korin Shtetëror të Odesës. Në vitin 2000 debutoi në Teatrin e Operës dhe Baletit të Odesës në rolin e Giorgio Germont (La Traviata), duke pasuruar më tej repertorin me role si Ibn-Hakia (Iolanta), Eugene Onegin, dhe Enrico (Lucia di Lammermoor).

Në vitin 2022 u ftua nga Novaya Opera në Moskë, ku interpretoi role si Nabucco, Eugene Onegin, Gryaznoy (The Tsar’s Bride), Zurga (Les pêcheurs de perles), Alfio (Cavalleria Rusticana), Silvio (Pagliacci) dhe të tjerë.

Vitaliy Bilyy rikthehet në skenë me Operën e Kosovës, ku do të interpretojë rolin e Escamilos në operën “Carmen” të Georges Bizet.

Zana Abazi-Ramadani në rolin e Micaëla

Zana Abazi-Ramadani është soprano nga Kosova me një karrierë të spikatur artistike e akademike. Studimet bachelor në solo-këndim i përfundoi në vitin 2008, në Fakultetin e Arteve të Universitetit të Prishtinës, në klasën e profesoreshës Merita Juniku. Studimet master i kreu në vitin 2015 në Universitetin e Shkupit, me notë maksimale 10 “Cum Laude”, nën udhëheqjen e profesoreshës Maria Muratovska-Naumovska. Ka ndjekur gjithashtu masterklase profesionale me Ermonela Jahon, Caroline Merz dhe në “Fontys University” në Holandë.

Ka interpretuar si soliste në një sërë vendesh evropiane, përfshirë Francën, Holandën, Zvicrën, Kroacinë, Gjermaninë, Suedinë dhe Hungarinë. Ka marrë pjesë në festivale dhe koncerte të rëndësishme si Mendelssohn Festival Hamburg, Ramë Lahaj International Opera Festival, DAM Festival, ReMusica, Chopin Piano FEST Prishtina dhe në koncerte zyrtare me Filharmoninë e Kosovës, Orkestrën Harkore të Operës së Kosovës dhe Ansamblin “NewBorn”.

Në repertorin operistik veçohet me rolin e Xhildës në operën “Rigoletto” të Verdit, të interpretuar në Teatrin e Operës dhe Baletit në Tiranë dhe në Operën dhe Baletin e Maqedonisë (2016), si dhe me rolin kryesor të “Fatimës” në premierën botërore të operës “Skënderbeu” të F. Lumanit (2019).

Ka mbi 23 vite përvojë në mësimdhënie në institucione të ndryshme arsimore në Kosovë, duke përfshirë Shkollën e Muzikës “Tefta Tashko”, Shkollën e Mesme të Muzikës “Prenk Jakova”, Universitetin e Prishtinës dhe Universitetin “Haxhi Zeka” në Pejë.

Carlos Cardoso në rolin e Don José

Carlos Cardoso debuton në Operën e Kosovës në sezonin 2024/25 në rolin e Don José (Carmen). I lindur në Tarouquela, Portugali, ai studioi këndim me Paulo Ferreira në Shkollën Beira Interior. Ka qenë anëtar i studios së Operës së Teatrit São Carlos në Lisbonë dhe, nga viti 2011 deri në 2013, i Accademia del Teatro alla Scala në Milano, ku interpretoi, ndër të tjera, rolin e Don Ramiro në La Cenerentola.

Që nga sezoni 2017/18 është anëtar i ansamblit të Aalto Theater Essen, ku ka interpretuar rolet e Dukës së Mantovës (Rigoletto), Ismaele (Nabucco), Alfredo (La traviata), Rodolfo (Luisa Miller), Don José (Carmen), Rodolfo (La bohème), Pinkerton (Madama Butterfly), Narraboth (Salome), Edgardo (Lucia di Lammermoor), Riccardo (Un ballo in maschera), Adorno (Simon Boccanegra) dhe Pollione (Norma).

Ka performuar gjithashtu në Rossini Opera Festival në Bad Wildbad, Gran Teatre del Liceu në Barcelonë, Teatro Verdi di Busseto, La Monnaie në Bruksel, Landestheater Salzburg, Teatro São Carlo në Lisbonë, Stadttheater Klagenfurt, Operën Kombëtare të Lituanisë në Vilnius dhe Teatro Verdi di Trieste.

Vikena Kamenica në rolin e Carmen

Vikena Kamenica është një prej solokëngëtareve më të njohura shqiptare në fushën e muzikës operistike dhe koncertale. E lindur në Tiranë, ajo është diplomuar në Akademinë e Arteve të Bukura në degën e Këndimit Lirik, ku ka studiuar me profesorë të njohur të muzikës shqiptare.

Menjëherë pas diplomimit, Kamenica u bë pjesë e trupës së Teatrit Kombëtar të Operës dhe Baletit në Tiranë, ku ka interpretuar një repertor të gjerë rolesh operistike. Ajo është e njohur veçanërisht për interpretimin e roleve kryesore në opera si Carmen (Georges Bizet), Rosina në Il Barbiere di Siviglia (G. Rossini), Dorabella në Così fan tutte (W. A. Mozart), si dhe për pjesëmarrje në opera shqiptare, duke kontribuar në promovimin e repertorit kombëtar.

Karriera e saj përfshin edhe turne dhe koncerte ndërkombëtare në Itali, Francë, Gjermani, Kosovë, Maqedoni të Veriut e vende të tjera, ku ka përfaqësuar denjësisht artin shqiptar. Ajo njihet për timbrin e ngrohtë, teknikën e saktë vokale dhe interpretimin emocional që përcjell në skenë.

Përveç veprimtarisë së saj si soliste, Vikena Kamenica është angazhuar edhe në mësimdhënie dhe mentorim të brezave të rinj të këngëtarëve, duke dhënë një kontribut të çmuar në edukimin artistik në Shqipëri.

Me një karrierë të pasur e të qëndrueshme, Vikena Kamenica mbetet një nga figurat më të rëndësishme të skenës operistike shqiptare. Në sezonin 2024–2025, Vikena Kamenica debuton me Operën e Kosovës në rolin e Carmen të Georges Bizet.

PETER VALENTOVIC si dirigjent të operës „Carmen“

Peter Valentovic (i lindur më 1980) është dirigjent dhe pianist sllovak me karrierë të gjerë ndërkombëtare. I diplomuar në dirigjim në Universitetin e Muzikës në Vjenë dhe në Paris, ai u dallua herët si pianist fitues konkursesh dhe shoqërues i artistëve të njohur.

Në moshën 21-vjeçare debutoi si dirigjent me Le Nozze di Figaro në Vjenë. Ka punuar si repetitor në Opéra Bastille dhe Théâtre du Châtelet në Paris dhe ka bashkëpunuar me Sir John Eliot Gardiner. Ka qenë dirigjent rezident dhe drejtues kori në Cape Town Opera, ku udhëhoqi vepra si Nabucco, Cavalleria Rusticana, Gianni Schicchi, A Midsummer Night’s Dream, Rusalka dhe Porgy and Bess. Ka mbajtur gjithashtu postin e dirigjentit në Operën Shtetërore Turke në Stamboll dhe është i ftuar i rregullt në Operën Kombëtare Sllovake dhe në Filharmoninë Sllovake.

Ndër bashkëpunimet e tij më të njohura janë koncertet gala dhe recitalet me Edita Gruberova dhe Pretty Yende, të cilat i kanë çuar në disa prej skenave më prestigjioze të botës si Theater an der Wien, Konzerthaus dhe Operën Shtetërore në Vjenë, La Scala në Milano, Deutsche Oper Berlin, si dhe në turne ndërkombëtare në Japoni me Operën Shtetërore të Pragës.

OGNIAN DRAGANOFF si regjisor të operës „Carmen“

Ognian Draganoff është regjisor bullgar me karrierë të gjatë dhe të pasur në teatrin operistik. Ai studioi performancë muzikore dhe regji operistike në Bullgari me Plamen Kartaloff dhe Vanya Bachvarova, duke u diplomuar në Akademinë Shtetërore të Muzikës “Panço Vladigerov” në Sofje, në klasën e Pavel Gerdzhikov. U specializua më tej në Opera du Rhin në Strasburg nën drejtimin e Albert-André Lheureux.

Pas një periudhe si anëtar i Orkestrës së Operës Kombëtare të Sofjes, ai u përkushtua regjisë dhe menaxhimit artistik. Nga viti 1996 deri në 2002 shërbeu si drejtor i përgjithshëm i Operës Kombëtare të Sofjes. Ka qenë gjithashtu drejtor i ftuar dhe rezident në shtëpi operistike në Greqi, Maqedoni dhe Rumani (2008–2012), si dhe drejtor kryesor i Operës në Sarajevë në të njëjtën periudhë.

Nga viti 2013 deri në 2015 drejtoi Operën Shtetërore Ruse në Bullgari, ndërsa prej vitit 2015 është drejtor i Operës Shtetërore të Stara Zagorës. Me mbi 80 produksione operistike në repertorin e tij, Draganoff njihet për vizionin e tij regjisorial dhe për shfaqje që janë prezantuar me sukses në shumë skena të Evropës Perëndimore, veçanërisht në Holandë.