Nga 26 në 22 vjet burg për Mustafën, Specialja: S’do të thotë se krimet s’janë të rënda, UÇK s’mbahet përgjegjëse

Lajme

Gazeta Express

14/12/2023 11:36

Ish-komandanti i Ushtrisë Çlirimtare të Kosovës, Salih Mustafa u dënua nga Apeli i Gjykatës Speciale me 22 vjet burgim për vrasje të paligjshme, ndalim arbitrar e torturë gjatë luftës.

Trupi gjykues i Apelit tha se zvogëlimi i dënimit ndaj Mustafës nga 26 në 22 vjet burgim “nuk sugjeron aspak se krimet për të cilat ai është shpallur fajtor dhe dënuar, nuk janë të rënda”.

“Gjatë shqiptimit të Aktgjykimit, Paneli i Gjykatës së Apelit theksoi se Aktgjykimi “është një hap i rëndësishëm drejt vendosjes së drejtësisë për viktimat dhe llogaridhënies,” dhe se zvogëlimi i dënimit të z. Mustafa “nuk sugjeron aspak se krimet për të cilat ai është shpallur fajtor dhe dënuar, nuk janë të rënda””, thuhet në njoftimin e Gjykatës Speciale.

Kryetarja e trupit gjykues, Michèle Picard, tha gjithashtu se trupi gjykues ka konstatuar se Mustafa mbante “përgjegjësi penale individuale” për krimet e luftës të torturës, ndalimit arbitrar dhe vrasjes së paligjshme dhe se “as UÇK-ja, as populli i Kosovës nuk ishin objekt i këtij procesi gjyqësor dhe nuk mbahen përgjegjës apo fajtorë për këto krime”.

“Apeli i z. Mustafa përmbante nëntë pika të ndara në 51 nënpika. Paneli i Apelit rrëzoi tetë pika të paraqitura nga z. Mustafa që kundërshtonin Aktgjykimin e Trupit Gjykues, ndërsa miratoi pjesërisht kundërshtimin e tij ndaj dënimit me 26 vjet burgim nga Trupi Gjykues për tri pikat e Aktakuzës që ishte shpallur fajtor”, thuhet në njoftimin e Gjykatës për aktgjykimin.