Neymar reagon pasi s’u ftua në Kombëtaren e Brazilit, mesazh i qartë për Ancelottin

Sport

Gazeta Express

17/03/2026 10:41

Neymar e ka shprehur zhgënjimin e tij të madh pasi u la jashtë listës së fundit të Kombëtares së Brazilit nga trajneri Carlo Ancelotti.

Sulmuesi i Santosit ka vendosur të flasë hapur, duke e dërguar një mesazh të qartë për situatën e tij, shkruan “Gazeta Express”.

“Jam i mërzitur dhe i zhgënjyer”, tha fillimisht ish-futbollisti i Barcelonës dhe Paris Saint-Germainit.

Ylli brazilian nuk e fshehu aspak zhgënjimin pas vendimit të trajnerit italian.

“Do të flas, sepse nuk mund ta mbaj këtë të heshtur. Natyrisht që jam i zhgënjyer dhe i mërzitur që nuk jam ftuar”, shtoi ai.

Megjithatë, Neymar tregoi edhe vendosmëri për të mos u dorëzuar, duke theksuar se mbetet i fokusuar te objektivat e tij dhe se do të vazhdojë të punojë çdo ditë për t’u rikthyer në nivelin më të lartë.

Vendimi i Ancelottit lidhet me gjendjen fizike

Pavarësisht se ka treguar sinjale rikthimi me Santosin, duke kontribuar me gola dhe asistime në ndeshjet e fundit, Neymar nuk arriti ta bindë stafin teknik për gjendjen e tij fizike.

Vendimi i Carlo Ancelottit lidhet kryesisht me faktin që lojtari nuk është ende në 100% të formës, pas problemeve të shumta fizike dhe rikuperimit të gjatë nga dëmtimi serioz në gju.

Gara me kohën për Kupën e Botës

Për Neymarin, kjo është një garë kundër kohës për ta siguruar një vend në Kupën e Botës 2026.

Edhe pse mungon në këtë grumbullim, dera nuk është mbyllur plotësisht për të.

Vetë lojtari e bëri të qartë se objektivi i tij mbetet i njëjtë: të rikthehet në formën më të mirë dhe të jetë pjesë e listës finale të Brazilit.

“Do të vazhdoj i fokusuar, ditë pas dite, stërvitje pas stërvitjeje, ndeshje pas ndeshjeje. Do ta arrijmë qëllimin”, ishte mesazhi i tij.

E ardhmja mbetet e hapur

Pavarësisht zhgënjimit aktual, Neymar vazhdon të besojë te rikthimi i tij në nivelin më të lartë ndërkombëtar. Vendimi përfundimtar për Kupën e Botës do të varet nga forma e tij në muajt në vijim, në një moment delikat të karrierës së tij. /Gazeta Express