Netflix nuk do të lejojë ndarjen e fjalëkalimeve, mund të ndalohen deri në 100 milionë llogari

AutoTech

Gazeta Express

23/01/2023 22:38

Goditja e Netflix ndaj llogarive të përbashkëta po zgjerohet.

Netflix njoftoi se vendimi për të mos lejuar ndarjen e fjalëkalimeve do të shtrihet “më gjerësisht”, pas një testi të kufizuar në Amerikën Latine.

Sipas Netflix, më shumë se 100 milionë familje po ndajnë llogaritë e tyre Netflix, e kjo po kushtëzon mundësinë për të investuar dhe përmirësuar platformën.

Netflix ka ndaluar gjithmonë ndarjen e llogarive në rregullat e tij, gjë që kërkon që një llogari të përdoret vetëm nga një familje. Por ajo kurrë nuk e ka zbatuar këtë rregull.

Tani do të shtojë veçori të reja që ndalojnë njerëzit të ndajnë llogari. Nëse zbulon se një llogari po ndahet, do t’i inkurajojë ata të paguajnë për llogarinë e tyre.

Në disa vende, Netflix do t’i lejojë njerëzit të paguajnë shtesë për të ndarë një llogari me njerëzit me të cilët nuk jetojnë.

Netflix sugjeroi që ndryshimi fillimisht mund të nënkuptojë që njerëzit të ndalojnë së shikuari, pasi ata janë përjashtuar nga llogaritë e përbashkëta.

Megjithatë, me kalimin e kohës, ajo beson se disa nga ato llogari do të kthehen dhe do të kontribuojnë në angazhim. Kjo tashmë ka ndodhur gjatë testimit në Amerikën Latine.