Në Galerinë e Arteve në Tiranë hapet ekspozita “Qoftë e shëndetshme dora që krijon”

Arte

Gazeta Express

08/01/2026 15:07

Në Galerinë e Artit në Tiranë vijon të qëndrojë e hapur ekspozita e qilimave historikë e titulluar “Qoftë e shëndetshme dora që krijon”. Ekspozita prezanton veprat e katër artistëve ndërkombëtarë nga Azerbajxhani dhe artistit shqiptar Xhevahir Kolgjini.

Në një kohë kur arti i të punuarit me dorë, si në art ashtu edhe në artizanat, po humbet terren për shkak të teknologjisë, disa artizanë dhe artistë janë angazhuar seriozisht për të ruajtur këto praktika të lashta.

“Qoftë e Shëndetshme Dora që Krijon” titullohet ekspozita me qilima ku zanati takohet me artin bashkëkohor, duke bërë bashkë artistët nga Azerbajxhani dhe Shqipëria.

Kjo ekspozitë sjell një ndërthurje harmonike mes traditës dhe modernitetit, duke treguar se si teknikat e vjetra të punimit me dorë mund të marrin jetë në format artistike të sotme.

Instalacionet, kompozimet me dritë dhe veprat artizanale krijojnë një hapësirë të pasur me simbolika, ku vizitorët mund të zbulojnë histori që udhëtojnë përtej brezave dhe kulturave.

“Qoftë e shëndetshme dora që krijon” vë në qendër mjeshtërinë dhe identitetin kulturor, duke kthyer galerinë në një vend reflektimi për bukurinë e traditave që vazhdojnë të frymëzojnë artin modern./Tema