Ndryshimi i thjeshtë i mendësisë që mund t’i ndihmojë të gjithë të humbin peshë në janar

Ushqimi/Dieta

Gazeta Express

02/01/2026 19:45

Janari është shpesh një muaj i zymtë: ditë të errëta, xhepa bosh pas festave dhe presion i madh për t’u futur sa më shpejt “në formën e jetës”.

Por, për fat të mirë për ata që e tepruan pak gjatë Krishtlindjeve dhe Vitit të Ri, humbja e kilogramëve nuk kërkon domosdoshmërisht dieta ekstreme apo injeksione dobësimi. Sipas hipnoterapistes së njohur Marisa Peer, mjafton të ndryshosh mënyrën si mendon.

Peer beson se mbingrënia – arsyeja kryesore e problemeve me peshën te shumë njerëz – është një problem emocional dhe duhet trajtuar si i tillë.

“Duhet ta kesh mendjen në anën tënde nëse do të jesh i shëndetshëm, jo të luftosh vazhdimisht dëshirën për ushqim të pashëndetshëm,” thotë ajo për Daily Mail.

“Askush nuk ha tepër sepse është i lumtur. Ne hamë tepër sepse jemi të stresuar, të mërzitur, të lodhur, të vetmuar. Prandaj është më efektive ta trajtosh emocionalisht, jo thjesht logjikisht.

Truri ynë është i programuar të na çojë drejt kënaqësisë. Ajo që funksionon është ta lidhësh më shumë kënaqësi me mosngrënien e ushqimeve të dëmshme sesa me ngrënien e tyre.

Duhet t’i thuash trurit se po ndryshon mënyrën si ushqehesh – dhe se të pëlqen kjo gjë.

Nëse mendon: ‘Duhet ta heq dorë, më mungon, tani jam një nga ata njerëzit e mërzitshëm në dietë’, ka shumë gjasa të dështosh.”

Peer thotë se këtë metodë e ka përdorur edhe vetë për të kontrolluar marrëdhënien e saj me ushqimin. Çelësi është që mendja nënndërgjegjshme të besojë se ti vetë po e bën zgjedhjen për të hequr dorë nga ëmbëlsirat, snack-et dhe fast food-i – jo se po detyrohesh.

Nëse kjo tingëllon e ndërlikuar, ajo siguron se nuk është.

“Fjalët që vijnë pas ‘Unë jam’ do të të ndjekin gjithë jetën,” shpjegon ajo.

“Mendo për pesë fjali ‘Unë jam’:

– Unë jam njeri që pi gjithmonë ujë para kafesë.

– Unë jam dikush që e do kafenë pa sheqer.

– Unë jam dikush që preferon perimet ndaj patateve të skuqura.

– Unë jam dikush që lexon etiketat dhe përbërësit.

– Unë jam dikush që minimizon sheqerin.

E di që duket pak e çuditshme, por kur këto fjali i përsërit vazhdimisht, ato funksionojnë.”

Për ta bërë këtë identitet të ri më të qëndrueshëm, Peer këshillon t’i shtosh gjithmonë edhe arsyen pse po e bën këtë zgjedhje.

“I thu vetes se po zgjedh të mos hash sheqer apo të mos pish alkool – dhe se po zgjedh të ndihesh mirë me këtë,” thotë ajo.

“Kur e lidh me kënaqësi të mëdha – ‘kam më shumë energji’, ‘lëkura më duket më mirë’, ‘nuk jam më i fryrë’ – gjithçka bëhet më e lehtë.”

Sipas saj, kjo qasje është edhe shumë më e butë me veten, sidomos në janar.

Një studim i Protein Works tregon se 2 janari është dita kulmore për reklamat e dietave në rrjetet sociale. Pikërisht atë ditë, miliona britanikë fillojnë palestrën, hedhin çokollatat e mbetura dhe betohen për “Dry January”.

Një sondazh i YouGov zbuloi se 17% e britanikëve e nisën vitin 2026 me synimin për të rënë në peshë.

23% duan të ushtrohen më shumë, 11% të ushqehen më shëndetshëm dhe 10% thjesht të jenë “më të shëndetshëm”.

Megjithatë, Peer beson se ekziston vetëm një vendim që sjell ndryshim real: të flasësh më pozitivisht me veten.

“Është shumë më e lehtë të heqësh dorë nga çokollata duke thënë: ‘Unë jam njeri që preferon ushqim të shëndetshëm’ sesa duke u ndaluar me forcë,” thotë ajo.

“Edhe nëse fillimisht nuk është e vërtetë, po i the vazhdimisht, një ditë do të bëhet.”

Kjo qasje vlen edhe për ata që po bëjnë “Dry January” ose që duan të kontrollojnë më mirë alkoolin.

“Thuaji vetes: ‘Po zgjedh të pi më pak. Po zgjedh të pi vetëm fundjavave. Po zgjedh të ndalem pas dy gotave – dhe të ndihem mirë me këtë’.

Kjo është shumë më mirë sesa: ‘Nuk mund të pi, prandaj jam i mërzitshëm’.”

Katër këshilla të tjera nga Marisa Peer

1. Vizualizimi

Ruaj në telefon citate frymëzuese dhe imazhe që përfaqësojnë stilin e jetesës që dëshiron: ushqime të shëndetshme, trupin që synon, aktivitetet fizike që të pëlqejnë.

“Ne e shohim telefonin gjithë kohën – përdore këtë në favorin tënd,” thotë ajo.

Ajo sugjeron edhe ndryshimin e fjalëkalimeve në diçka motivuese, si p.sh. “life_without_sugar”.

2. Larg syve, larg mendjes

Truri ynë ende sillet sikur sheqeri është i rrallë, si në kohën e njeriut primitiv.

“Prandaj është më mirë të mos e kesh në shtëpi, ose të paktën ta mbash jashtë shikimit,” këshillon Peer.

3. Kufizimi i qëllimshëm

Në vend që ta ndalosh plotësisht veten, cakto një ditë ose moment kur lejohet një kënaqësi.

“Nëse i thua vetes ‘kurrë’, sapo ta thyesh rregullin, vjen faji – dhe pastaj e përsërit.”

4. Shijoje ‘gabimin’

Nëse ndodh të hash apo të pish diçka që po përpiqesh ta kufizosh, shijoje me vetëdije.

“Haje ngadalë, shijoje. Ngrënia e ngadaltë është një nga gjërat më të mira për tretjen,” thotë ajo.

Sipas Peer, ndryshimi i vërtetë nuk vjen nga ndëshkimi i vetes, por nga ndërtimi i një identiteti të ri – ku të ushqehesh shëndetshëm nuk është sakrificë, por pjesë e asaj që je. /GazetaExpress/