Ndërrimi i pushtetit, Albin Kurti e merr zyrtarisht detyrën e kryeministrit

Gazeta Express

04/02/2020 11:08

Lideri i Lëvizjes Vetëvendosje, Albin Kurti, e ka pranuar edhe zyrtarisht detyrën e kryeministrit të Kosovës, raporton Gazeta Express.

Pranim-dorëzimi i detyrës së të parit të Qeverisë është bërë nga ish-zëvendëskryeministri Behgjet Pacolli, pasi që ish-kryeministri Ramush Haradinaj nuk mundi ta dorëzojë mandatin sepse ka bërë të ditur se është në një vizitë në SHBA.

“Haradinaj nuk është këtu. Suksese të mëdha dhe shëndet. Për ju dhe për Kosovën, është një ditë jashtëzakonisht e rëndësishme. Fillon një fillim i ri. Kemi sfida të mëdha dhe këto mund të përballohen vetëm me profesionalizëm”, tha Pacolli.

Para se të bëhej zyrtarisht dorëzimi i detyrës, Kurti dhe Pacolli kanë kaluar pranë gardës së FSK-së.

Njerëz të shumtë ishin mbledhur për të shikuar nga afër këtë ceremoni. /GazetaExpress/