NATO zgjeron kontrollin satelitor në Ukrainë për të ndaluar çdo përshkallëzim nga Rusia

Lajme

Gazeta Express

12/06/2025 13:50

NATO po forcon kapacitetet e saj të mbikëqyrjes satelitore për të vëzhguar zona të mëdha të tokës dhe për të ndjekur nga afër lëvizjet ushtarake në Ukrainë dhe përgjatë kufijve lindorë me Rusinë. Këtë e bëri të ditur komandanti i lartë i aleancës, Pierre Vandier.

Vandier theksoi se teknologjia e re do t’i mundësojë NATO-s të identifikojë në kohë reale manovrat ushtarake dhe operacionet në terren, duke përfshirë edhe respektimin e mundshëm të një armëpushimi në Ukrainë – një çështje e ndjeshme për shtetet evropiane.

“Ne nuk jemi të sigurt nëse rusët do të ndalen te Ukraina,” paralajmëroi Vandier, duke nënvizuar rëndësinë e mbrojtjes së anëtarëve lindorë të aleancës. “Ne do të jemi në gjendje t’u themi atyre: ne po vëzhgojmë”, tha ai në një intervistë për Bloomberg News.

NATO njoftoi gjithashtu se ka zgjedhur kompaninë amerikane të teknologjisë hapësinore Planet Labs për të implementuar projektin e ri pilot, të quajtur Smart Indication And Warning Broad Area Detection (SINBAD). Ky sistem përdor inteligjencën artificiale për të analizuar vazhdimisht pamjet satelitore dhe për të lëshuar paralajmërime për çdo ndryshim të dyshimtë.

Përveç kufijve lindorë, teknologjia do të përdoret edhe për të monitoruar Arktikun – një rajon me rëndësi strategjike në rritje për NATO-n përballë rritjes së interesit të Rusisë dhe Kinës.

Projekti SINBAD është faza fillestare e një programi më të gjerë të mbikëqyrjes satelitore që NATO planifikon të nisë zyrtarisht në janar të vitit 2026.