Naser Selmani: Padia e VLEN kundër Bujar Osmanit ia forcon imazhin

Maqedoni

Gazeta Express

31/08/2025 13:03

Gazetari Naser Selmani vlerëson se kallëzimi penal i paraqitur nga VLEN kundër kandidatit të opozitës shqiptare për kryetar të Çairit, Bujar Osmani, përfaqëson një “goditje të ulët nën brez” që rrezikon të dëmtojë legjitimitetin e procesit zgjedhor në bllokun politik shqiptar.

Në një analizë të publikuar për opinionin, Selmani nuk ndalet te përmbajtja e vetë kallëzimit, por te koha dhe konteksti politik në të cilin ai paraqitet menjëherë para fillimit të fushatës zgjedhore.

“Fakti që iniciativa vjen nga një parti në pushtet, dhe kjo para zgjedhjeve, ngre dyshime serioze se po përdoren metoda jodemokratike për të ndikuar mbi rezultatin zgjedhor,” shkruan Selmani, duke theksuar se veprime të tilla ushqejnë perceptimin për abuzim me institucionet e drejtësisë për qëllime politike.

Sipas Selmanit, VLEN është pjesë e pushtetit tashmë më shumë se një vit dhe ka pasur mjaft kohë të veprojë institucionalisht kundër çdo ish-funksionari, nëse vërtet kanë ekzistuar indicie për shkelje.

“Pse kjo procedurë nuk është iniciuar më herët? Ose pse nuk u prit të kalojnë zgjedhjet? Veprat e mundshme penale nuk parashkruhen,” pyet ai, duke aluduar se motivet janë politike e jo juridike.

Selmani paralajmëron se një veprim i tillë mund të ketë edhe efekt të kundërt, të forcojë imazhin e Osmanit si viktimë e ndjekjes politike, sidomos për shkak të lidhjeve të tij të forta vendore e ndërkombëtare, si dhe peshës së forcës politike që ai përfaqëson.

“Viktimizimi i Osmanit mund vetëm të forcojë imazhin e tij publik dhe t’i japë opozitës një agjendë të qartë politike,” shkruan Selmani.

Për Selmanin, kallëzimi është dëshmi e pasigurisë politike te VLEN dhe te lideri i saj Izet Mexhiti, i cili, në vend që të promovojë kandidatin dhe vizionin e tij, zgjedh një fushatë negative.

Për më tepër, analiza thekson se Mexhiti nuk mund ta përdorë më me të njëjtën bindje argumentin kundër BDI-së për premtime të parealizuara, duke pasur parasysh pjesëmarrjen e tij personale në pushtet si tre herë kryetar i Çairit.

“Nëse BDI nuk ka bërë asgjë për 20 vjet, atëherë çfarë ka për të treguar Mexhiti nga tre mandatet e tij?” pyet Selmani, duke shtuar se një pyetje e tillë nuk mund të shmanget më dhe se shqiptarët kërkojnë përgjigje.