Napoli i nis “punimet” për kontratën e re të McTominayt

Futboll

Gazeta Express

15/02/2026 16:41

Raportimet nga Italia bëjnë të ditur se po punohet që Scott McTominay të shpërblehet me një kontratë të re dhe të përmirësuar te Napoli, pas një 18-mujori fantastik në Serie A.

McTominay iu bashkua Napolit nga Manchester United në verën e vitit 2024 për 30.5 milionë euro dhe menjëherë u vendos si një nga lojtarët më të rëndësishëm në “Stadio Maradona”.

Në sezonin e tij të parë në Napoli, mesfushori skocez ndihmoi Partenopeit të fitonin Scudetton e dytë brenda tre vitesh dhe fitoi edhe çmimin MVP të kampionatit.

Në momentin e transferimit nga Manchester United, McTominay firmosi kontratë katërvjeçare që skadon në verën e vitit 2028.

Sipas “Corriere dello Sport”, Napoli dëshiron ta zgjasë marrëveshjen deri në verën e vitit 2030.

Raporti i së dielës thotë se agjenti i McTominay ka mbërritur së fundmi në Napoli për bisedime dhe tashmë ka zhvilluar takim me drejtorin sportiv Giovanni Manna për kushtet e mundshme të kontratës së re.

Shifra konkrete të pagës nuk janë bërë ende publike, por pritet që lojtari të shpërblehet me kushte më të mira personale, pasi gjatë vitit e gjysmë të fundit është vendosur edhe në diskutimet për Topin e Artë.

Sezonin e kaluar, gjatë fushatës së titullit, McTominay realizoi 12 gola dhe 6 asistime, ndërsa këtë sezon ka kontribuar me 10 gola dhe 4 asistime në Serie A dhe Ligën e Kampionëve.

Ai ka munguar në ndeshjen e fundit të Napolit pasi u dëmtua gjatë fitores 3-2 ndaj Genoas fundjavën e kaluar dhe nuk do të jetë në dispozicion kundër Romës të dielën, teksa vazhdon rikuperimin./GazetaExpress/