Mungon prokurori dhe njëri i akuzuar, shtyhet sërish gjykimi për huliganizëm dhe sulm ndaj policëve

Lajme

Gazeta Express

27/03/2025 11:57

Seanca e paraparë për të enjten në Gjykatën Themelore në Prishtinë në rastin ndaj të akuzuarve Kushtrim Avdimetaj, Veron Hasani dhe Ardian Huli për huliganizëm dhe sulm ndaj policëve në protestat e 2015-ës, ka dështuar për shkak të mungesës së prokurorit të shtetit dhe të akuzuarit Huli.

Gjykatësi i rastit, Eroll Gashi tha se prokurori i shtetit dhe i akuzuari Huli janë ftuar me ftesë të rregullt, raporton “Betimi për Drejtësi“.

Në anën tjetër, mbrojtësi i të akuzuarit Huli, avokati Fis Alishani tha se i mbrojturi i tij nuk mund të paraqitet në seancë për arsye shëndetësore.

Në mungesë të kushteve ligjore, seanca u shty për një datë tjetër.

Edhe seanca e 12 shkurtit 2025 dhe ajo e 26 marsit 2025 ishin shtyrë në mungesë të prokurorit të shtetit.

Ndryshe, sipas aktakuzës së Prokurorisë Themelore në Prishtinë të ngritur më 17 dhjetor 2015, në këtë rast akuzohen Egzon Azemi, Luan Hoti, Naim Bunjaku, Kushtrim Avdimetaj, Veron Hasani dhe Ardian Huli.

Mirëpo, për të akuzuarit Avdimetaj, Hasani dhe Huli është veçuar procedura penale dhe ndaj tyre veçmas po zhvillohet procesi gjyqësor.

Në aktakuzë thuhet gjashtë të akuzuarit e lartcekur më 17 dhe 18 nëntor 2015, kanë marrë pjesë në turmën-protestën e organizuar, e cila protestë ka eskaluar dhe përkundër faktit se forcat e rendit vetëm ishin rreshtuar dhe po mbanin situatën nën kontroll, të akuzuarit si pjesëmarrës aktiv të protestës, i kanë sulmuar seriozisht policët e Kosovës, duke i goditur me gurë, pllaka betoni dhe mjete tjera të forta.

Aty thuhet se si pasojë e kësaj u janë shkaktuar lëndime të lehta trupore pjesëtarëve të policisë, të dëmtuarave Smail Sadiku, Naim Berisha dhe Ekrem Vllasa, si dhe janë shkaktuar dëme të konsiderueshme materiale.

Me këto veprime, Prokuroria i ngarkon të akuzuarit se kanë kryer veprën penale “Pjesëmarrja në turmë që kryen vepër penale dhe huliganizmi”, nga neni 412, paragrafi 1, si dhe veprën penale “Sulmi ndaj personit zyrtar gjatë kryerjes së detyrës zyrtare”, nga neni 410, paragrafi 2 lidhur me nenin 31 të Kodit Penal të Republikës së Kosovës.