Morina: S’duhet të presim suksese në Evropë, futbollistët tanë nënçmohen shkaku i vizave - Gazeta Express

Gazeta Express

03/07/2020 20:35

Morina: S’duhet të presim suksese në Evropë, futbollistët tanë nënçmohen shkaku i vizave

Gazeta Express

03/07/2020 20:35

Trajneri i njohur kosovar dhe drejtori sportiv i Flamurtarit, Arbnor Morina, thotë se nuk është e drejtë të priten suksese të mëdha nga klubet kosovare në ligat evropiane, përderisa ka shtuar se futbollistët kosovarë vazhdojnë të jenë të nënçmuar shkaku i vizave.

Më 3 maj të vitit 2016, Kosova u bë anëtare me të drejta të plota në UEFA, organin qeverisës të futbollit në Evropë. Ekipet kosovare, që nga atëherë, mund ta kualifikohen në dy garat evropiane – Ligën e Kampionëve dhe Ligën e Evropës, transmeton Gazeta Express.

Për herë të parë, Kosova u përfaqësua nga klube vendore në Evropë gjatë sezonin 2017/18 dhe që nga atëherë Kosova është ngritur në radhitjen e UEFA për koeficientët e ligave, duke bërë kështu që Kosova të garojë më tri klube nga sezoni i ardhshëm në kualifikimet për garat evropiane.

Në Ligën e Kampionëve, Trepça ’89 humbi qysh në rundin e parë në sezonin 2017/18. Në sezonin vijues, Drita e kaloi rundin parakualifikues, por humbi në rundin e parë – njëjtë si Feronikeli këtë sezon.

Ndërsa, në Ligën e Evropës, Prishtina ishte klubi i parë kosovar që mori pjesë në këtë garë, duke pësuar humbje qysh në rundin e parë kualifikues. Në sezonin vijues 2018/19, Prishtina e fitoi duelin në rundin parakualifikues, por humbi në rundin e para kualifikues, ndërsa Drita pësoi disfatë në rundin e dytë kualifikues. Këtë sezon, Prishtina u eliminua qysh në rundin parakualifikues, ndërsa Feronikeli në rundin e dytë kualifikues.

Nga gjithsej 22 ndeshje të zhvilluara nga klubet kosovare në Evropë, janë regjistruar pesë fitore, pesë barazime dhe 12 disfata. Por, Morina beson se s’duhet të pritet që klubet kosovare të kenë suksese më të mëdha menjëherë.

“S’ka mundur të pritet të kemi sukses sepse s’është e mjaftueshme t’i kesh 11 lojtarë të mirë edhe të dalësh tash ta mposhtësh krejt Evropën. Kjo është iluzore. Ky është ai disbalanci te ne, njerëzit i shikojnë ligat evropiane dhe mendojnë që edhe lojtarët e Kosovës duhet të luajnë si ata”, ka thënë Morina në emisionin sportiv “Favorit” në T7.

“Jo, të mos harrojmë që vetëm në dy apo tre vjetët kanë filluar të bëhen nga një fushë ndihmëse me bar artificial. Ende asnjë klub i joni s’e ka restorantin ku mund të ushqehen lojtarët ashtu siç duhet, në bazë të stërvitjes që e ka atë ditë”.

“Unë prapë them që këto rezultate që i kemi arritur në Evropë janë sukses. Është hera e parë që dalim në Evropë, nuk duhet t’i akuzojmë, por t’u themi “Bravo”.  Ne nuk mund të kërkojmë të hyjmë menjëherë në grupe të Ligë të Kampionëve”.

“Edhe unë kam qejf ta shoh secilin ekip të Superligës t’i kalojë gjashtë-shtatë xhiro në Evropë, por nuk ka mundësi. Djemtë tonë hala duhet të presin atje për të marrë vizë për të shkuar të luajë në një shtet, edhe kjo është nënçmim”. /Gazeta Express/