Modi ia thotë Trumpit: Armëpushimi me Pakistanin u arrit pa ndërmjetësim amerikan

Lajme

Gazeta Express

18/06/2025 14:35

Një diplomat i lartë Indian, ka bërë të ditur se kryeministri indian Narendra Modi i ka thënë presidentit amerikan Donald Trump të martën mbrëma se armëpushimi mes Indisë dhe Pakistanit pas konfliktit katërditor në maj, është arritur si rezultat i bisedimeve mes ushtrive të dy vendeve, e jo nga ndërmjetësimi i SHBA-së, raporton Reuters.

Kujtojmë se Trump kishte deklaruar muajin e kaluar se fqinjët me armë bërthamore në Azinë Jugore kishin rënë dakord për një armëpushim pas bisedimeve të ndërmjetësuara nga SHBA. Megjithatë, India e ka mohuar më parë çdo ndërmjetësim nga palë të treta, dhe telefonata e së martës mes Modi dhe Trump – në kuadër të samitit G7 në Kanada, ku Modi mori pjesë si i ftuar – ishte kontakti i tyre i parë i drejtpërdrejtë pas konfliktit të 7-10 majit.

“Kryeministri Modi i tha presidentit Trump qartë se gjatë asaj periudhe, nuk pati asnjë bisedë në asnjë fazë për çështje si marrëveshja tregtare Indi-SHBA apo ndërmjetësimi i SHBA mes Indisë dhe Pakistanit,” është shprehur sekretari i Jashtëm i Indisë, Vikram Misri, në një deklaratë për shtyp, transmeton Express.

Ai tutje ka shtuar se, “bisedimet për ndalimin e veprimeve ushtarake ndodhën drejtpërdrejt mes Indisë dhe Pakistanit përmes kanaleve ekzistuese ushtarake, dhe me këmbënguljen e Pakistanit. Kryeministri Modi theksoi se India nuk ka pranuar kurrë ndërmjetësim në të kaluarën dhe nuk do ta pranojë asnjëherë”.

Rikojtojmë se më 7 maj, avionët indianë bombarduan ato që Neë Delhi i quajti “infrastrukturë terroriste” përtej kufirit, duke shkaktuar sulme të ndërsjella për katër ditë, gjatë të cilave të dyja palët përdorën avionë luftarakë, raketa, dronë dhe artileri.