Mjeti sekret i CIA-s që gjeti pilotin amerikan në Iran

Mistere

Gazeta Express

08/04/2026 21:46

CIA përdori një mjet sekret të quajtur “Ghost Murmur” për të gjetur pilotin amerikan që u qëllua mbi jugun e Iranit.

Sipas burimeve të njohura me këtë teknologji, pajisja përdor magnetometri kvantik me distancë të gjatë për të kapur edhe rrahjet më të dobëta të zemrës. Ajo skanon gjurmët elektromagnetike të zemrës njerëzore, ndërsa të dhënat filtrohen nga inteligjenca artificiale për të izoluar sinjalin individual nga zhurma e ambientit.

Burime thanë për New York Post se Ghost Murmur është zhvilluar nga divizioni i famshëm sekret i Lockheed Martin, Skunk Works, i njohur për krijimin e avionëve spiun U-2 dhe Blackbird.

Një burim e përshkroi teknologjinë kështu: “Është si të dëgjosh një zë në një stadium, por stadiumi është një mijë milje katrorë shkretëtirë. Në kushtet e duhura, nëse zemra jote rreh, ne do të të gjejmë.”

Teknologjia u përdor për të gjetur një oficer të sistemeve të armëve të plagosur, i njohur publikisht si “Dude 44 Bravo”, i cili ishte fshehur në një shpellë malore pas rrëzimit të F-15-ës së tij. Ai mbijetoi për dy ditë në terren të vështirë, ndërsa trupat iraniane kontrollonin zonën.

Shkretëtira ofroi një ambient ideal për përdorimin e parë operativ të Ghost Murmur, falë interferencës elektromagnetike të ulët dhe mungesës së gjurmëve të tjera njerëzore. Edhe pse Dude 44 Bravo kishte aktivizuar sinjalin e shpëtimit të bërë nga Boeing, pozicioni i tij i saktë mbetej i panjohur deri sa u identifikua nga Ghost Murmur.

Burimet shpjeguan se zakonisht sinjali është kaq i dobët sa mund të maten vetëm në spital, me sensorët të vendosur afër gjoksit. Por përparimet në magnetometrinë kvantike, duke përdorur defekte mikroskopike në diamante sintetike, e bëjnë të mundur zbulimin e këtyre sinjaleve nga distanca shumë më e madhe.

Teknologjia funksionon më mirë në ambiente të largëta dhe të pastra, dhe kërkon kohë të konsiderueshme për përpunim. Magnetometria kvantike përdoret zakonisht për objektet e mëdha si planetët e largët ose për detaje shumë të vogla si nervat në trupin njerëzor, dhe teorikisht mund të zbulojë sinjalin elektromagnetik të një rrahjeje zemre.

Ghost Murmur është testuar me sukses edhe me helikopterët Black Hawk dhe pritet të përdoret në të ardhmen edhe me avionët F-35.

Presidenti Donald Trump dhe Drejtori i CIA-s, John Ratcliffe, e përmendën teknologjinë e klasifikuar gjatë një konference për shtyp. Ratcliffe tha se CIA kishte arritur qëllimin kryesor duke gjetur dhe konfirmuar se një nga më të mirët dhe më të guximshmit ishte gjallë dhe i fshehur në një çarje mali. Trump shtoi se pilotin e kishin identifikuar edhe nga një distancë prej 40 miljesh dhe përshkroi një operacion shpëtimi masiv me 155 aeroplanë, përfshirë avionë luftarakë, tanke karburanti dhe helikopterë, duke lavdëruar aftësinë dhe saktësinë e forcave amerikane. /GazetaExpress/