Mjeku gastroenterolog paralajmëron: Festat sjellin mbingrënie, por disa “food coma” mund të jenë shenja të kancerit të zorrës

Ushqimi/Dieta

Gazeta Express

09/12/2025 20:07

Shprehja “Jam ngopur!” që dëgjohet shpesh nëpër tryezat e festave zakonisht shihet si tregues i një darke të suksesshme—por një mjek i aparatit tretës ka paralajmëruar se pesë simptoma tipike të fryrjes së Krishtlindjeve mund të jenë gjithashtu shenja të hershme të kancerit të zorrës.

Gjatë sezonit festiv, nuk është e pazakontë që njerëzit të konsumojnë më shumë alkool se zakonisht, pjatanca me djathëra, byrekë të yndyrshëm, grushta çokollatash, sanduiçe sezonale dhe pije të ëmbla nga rrugicat e qytetit… madje shumë përpara se të ulen për darkën e Krishtlindjes.

Me kaq shumë ushqime të rënda e të pasura të konsumuara pothuajse çdo ditë, Dr. Fuad Jafarov, gastroenterolog nga grupi shëndetësor turk ACIBADEM, thotë se është krejt normale që njerëzit të përjetojnë fryrje dhe ndryshime në zakonet e zorrëve gjatë muajve të fundit të vitit.

Megjithatë, disa ndryshime mund të mos lidhen vetëm me teprimin me një mince pie, por të jenë shenja paralajmëruese të kancerit të zorrës.

Dr. Jafarov theksoi se kanceri i zorrës është shumë më i trajtueshëm kur kapet herët, prandaj njerëzit duhet t’i kushtojnë vëmendje sinjaleve të trupit, veçanërisht pasi të kenë kaluar ditët e mbingrënies festive.

Ai shtoi se kjo “mund të bëjë diferencën mes mbijetesës ose, fatkeqësisht, diçkaje shumë më serioze”.

Çdo vit, rreth 42,000 britanikë diagnostikohen me kancer të zorrës, ndërsa 17,400 humbin jetën nga kjo sëmundje. Në dekadën e fundit është vërejtur një rritje shqetësuese e rasteve tek personat nën 50 vjeç, dhe ekspertët ende nuk e dinë arsyen e saktë.

Dr. Jafarov shpjegoi se fryrja mund të jetë normale, por jo nëse zgjat më shumë se sa pritet.

Simptomat e hershme të kancerit të zorrës përfshijnë:

gjak në feçe

ndryshime në zakonet e zorrëve

humbje peshe

lodhje

dhimbje, gungë ose bllokim të zorrëve.

Një tjetër simptomë shumë e zakonshme e hershme është fryrja, e cila nga shumë britanikë konsiderohet pjesë e pandashme e periudhës festive.

Sipas tij, shumica e njerëzve nuk duhet të shqetësohen nga fryrja pas darkës së Krishtlindjes, pasi overeating dhe ushqimet që prodhojnë gaz janë të zakonshme.

Por fryrja pa arsye të qartë, kur nuk janë konsumuar ushqime që zakonisht e shkaktojnë këtë, dhe që vazhdon për javë të tëra, duhet të ngrejë shqetësim—sidomos kur shoqërohet me ndryshime në zakonet e zorrëve.

Dr. Jafarov shtoi se në kontekstin e kancerit të zorrës, fryrja ka të bëjë më pak me një vakt të rëndë dhe më shumë me një ndjesi të vazhdueshme të fryrjes dhe mbushjes së barkut që nuk qetësohet.

Konsumimi i tepërt i ushqimit dhe pijes gjatë festave sjell edhe më shumë vizita në tualet, por edhe kjo mund të jetë shenjë paralajmëruese e kancerit të zorrës, sidomos nëse njerëzit vërejnë se shkojnë më shpesh se zakonisht për javë të tëra.

Sipas tij, kanceri i zorrës mund të shkaktojë:

feçe më të lëngshme

urgjencë për të defekuar

ndjesinë se zorrët nuk janë zbrazur plotësisht.

“Nuk ka një numër fiks që përcakton ‘shumë shpesh’ apo ‘shumë rrallë’. Shenja kryesore është ndryshimi nga rutina normale për disa javë dhe pamundësia për t’u kthyer në normalitet,” theksoi ai.

Një tjetër simptomë shqetësuese është lodhja e skajshme.

Ndjesia e përgjumjes pas një darke të madhe të Krishtlindjes është e kuptueshme, por lodhja që është e pazakontë, zgjat për shumë kohë dhe nuk lidhet me aktivitetin normal ditor, mund të jetë alarmuese.

Sipas doktorit, kanceri i zorrës mund të shkaktojë humbje të ngadaltë dhe të vazhdueshme të gjakut, që më pas çon në anemi nga mungesa e hekurit, duke shkaktuar lodhje që nuk përmirësohet as me gjumë shtesë.

Një nga shenjat më të dukshme të humbjes së gjakut mund të shihet në tualet—feçe me gjak ose gjak në letër pas fshirjes.

Dr. Jafarov shpjegoi se ushqime si panxhari, cranberry sauce dhe ngjyruesit e kuq ushqimor mund të japin përkohësisht ngjyrë të kuqërremtë apo rozë në feçe, dhe kjo është e padëmshme.

Por gjaku i vazhdueshëm, i errët ose i përzier me feçet, duhet të kontrollohet menjëherë nga mjeku, pasi mund të jetë shenjë e kancerit të zorrës.

Simptoma e fundit që doktori theksoi është ndjenja e ngopjes së shpejtë, humbja e oreksit ose humbja e pavullnetshme e peshës.

Ai shpjegoi se ndjesia e ngopjes shumë shpejt, e njohur si ngopje e hershme, mund të lidhet me sëmundje që prekin sistemin tretës, përfshirë edhe kancerin e zorrës.

Ndërsa gjatë Krishtlindjeve është normale të ndihesh i stërngopur, sidomos nëse ke ngrënë çokollata dhe snacks gjatë ditës, një model i vazhdueshëm i humbjes së oreksit, ngopjes së shpejtë ose humbjes së paqëllimshme të peshës duhet të kontrollohet nga një mjek.

Ai theksoi gjithashtu se njerëzit duhet të krahasojnë oreksin dhe zakonet e tyre të ngrënies me periudhat normale. Nëse ndjehen të ngopur shumë shpejt, sidomos para darkës së Krishtlindjes dhe kjo është e pazakontë për ta, është e rëndësishme të kërkohet ndihmë mjekësore. /GazetaExpress/