Mjekimet kundër HIV'it dhe Ebola's testohen si trajtime të mundshme për koronavirusin - Gazeta Express

Ballina

Gazeta Express

20/02/2020 20:30

Mjekimet kundër HIV’it dhe Ebola’s testohen si trajtime të mundshme për koronavirusin

Ballina

Gazeta Express

20/02/2020 20:30

Dy mjekime që janë zhvilluar për të luftuar virusin HIV janë duke u testuar në Kinë, për të parë nëse funksionojnë edhe kundër koronavirusit të ri, sipas Organizatës Botërore të Shëndetësisë (OBSH).

Një tjetër test klinik përfshin një mjekim që fillimisht u krijua për të trajtuar Ebola-n, por u zbulua se ishte më pak efektiv kundër temperaturës vdekjeprurëse.

“Për tre javë presim rezultatet paraprake”, deklaroi drejtori i përgjithshëm i OBSH-së, Tedros Adhanom Ghebreyesus në një konferencë për shtyp në Gjenevë.

Ndërkohë, përpjekjet e Kinës për të menaxhuar epideminë vrastare, e lidhur me koronavirusin e ri, po funksionojnë, tha kryediplomati kinez, Wang Yi, i cili ia atribuoi uljen e rasteve të reja të infektimit veprimtarisë energjike të vendit të tij kundër sëmundjes.

Në një fjalim të mbajtur në Vientiane për koronavirusin, pas takimit me homologët e tij të dhjetë vendeve anëtare të ASEAN-it, ministri kinez deklaroi se epidemia është e kontrollueshme dhe e kurueshme, pavarësisht shqetësimit që ka shkaktuar në mbarë botën.

Kina njoftoi sot për një rënie dramatike të rasteve të reja të infektimit, më e ulëta pas gati një muaji, me një rritje neto prej 394 rastesh, vetëm 25 % e shifrës së njoftuar një ditë më parë.

Numri i përgjithshëm i rasteve të infektimit e ka kaluar numrin 74 500 në Kinën kontinentale, ku epidemia ka shkaktuar 2 118 viktima.

Jashtë Kinës kontinentale, në vendet e territoret e tjera, COVID-19 ka shkaktuar 10 viktima.