Ministri serb i Mbrojtjes: Ka presion ndaj Aleksandar Vuçiqit për të disiplinuar Milorad Dodik-un

Lajme

Gazeta Express

22/02/2024 8:56

Ministri serb i Mbrojtjes Millosh Vuçeviq tha se ka presion ndaj Serbisë dhe presidentit të saj Aleksandar Vuçiq për të disiplinuar Banja Lukën dhe presidentin e Republikës Srpska Milorad Dodik.

I ftuar në emisionin Telering, Vuçeviq tha se Serbia kujdeset për mbijetesën e Republikës Srpska, por Republika Srpska ka politikën e saj, udhëheqjen e saj, të cilën e zgjedhin qytetarët në zgjedhje.

Vuçeviq thotë se ata e respektojnë Bosnjën dhe Hercegovinën si një vend fqinj, i përbërë nga dy entitete të barabarta dhe tre kombe përbërëse. Çdo gjë që përjashton një komb dhe një entitet, gjithçka që imponohet nuk është e mirë për Bosnje-Hercegovinën.

“Ndryshe nga disa struktura politike në Sarajevë, ne themi shumë qartë se respektojmë integritetin territorial të Bosnjë-Hercegovinës, por elita politike në Sarajevë nuk e respekton realisht integritetin territorial të Serbisë. Megjithatë, ai nuk mund ta zbatojë atë zyrtarisht për shkak të Republikës Srpska dhe popullit serb në BeH në lidhje me Kosovën”, tha Vuçeviq.