Minatorët kërkojnë rritje të pagave: Rrezikojmë jetën dhe shëndetin në kushte të vështira, s’ka ligj të veçantë që na mbron

Lajme

Gazeta Express

04/11/2025 12:02

Sindikata e Pavarur e Minatorëve të Trepçës, ka njoftuar se minatorët po kërkojnë rritje të pagave. Në njoftimin e sindikatës thuhet se minatorët prej vitesh kanë punuar duke shpresuar që gjendja të përmirësohet.

Po ashtu, aty thuhet edhe se, tanimë është normale dhe e drejtë që menaxhmenti i kësaj ndërmarrjeje të hapa konkret për rritje të pagave të minatorëve, tani që, qeveria ka paralajmëruar diçka të tillë.

‘‘Çdo ditë rrezikojmë jetën dhe shëndetin duke punuar në kushte të vështira dhe pa mjete të mjaftueshme. Pa një ligj të veçantë që na mbron, detyrohemi të vazhdojmë punën edhe kur rreziku është i lartë’’, thuhet mes tjerash në reagim.

Postimi:

Kërkesë e minatorëve

Të nderuar minatorë dhe qytetarë,

Të gjithë po ndjejmë çdo ditë rritjen e çmimeve, rritjen e inflacionit dhe vështirësitë në jetën ekonomike. Ne, minatorët, prej shumë vitesh kemi punuar me durim dhe solidaritet për ndërmarrjen tonë, duke shpresuar që gjendja të përmirësohet, dhe kemi duruar pa kërkuar rritje pagash, edhe pse sektorë të tjerë kanë pasur lëvizje dhe përmirësime.

Tani që qeveria ka paralajmëruar rritje pagash për sektorët publikë dhe ka premtuar pagën e 13-të, është normale dhe e drejtë që edhe menaxhmenti i ndërmarrjes sonë të bëjë hapa konkretë për rritje të pagave të minatorëve.

Gjatë vitit të fundit, puna jonë ka sjellë rritje të dukshme të prodhimit. Ky sukses nuk do të kishte ndodhur pa përkushtimin e minatorëve. Prandaj, kërkojmë që puna dhe sakrifica jonë të vlerësohen dhe të shpërblehen me rritje pagash, po ashtu siç po ndodh në sektorët e tjerë publikë dhe privatë.

Çdo ditë rrezikojmë jetën dhe shëndetin duke punuar në kushte të vështira dhe pa mjete të mjaftueshme. Pa një ligj të veçantë që na mbron, detyrohemi të vazhdojmë punën edhe kur rreziku është i lartë.

Është koha që menaxhmenti të marrë vendime konkrete për mirëqenien tonë: rritje pagash dhe respekt për punën dhe sakrificat që bëjmë çdo ditë.

Me respekt,

Kryesia e Sindikatës