Mikel Arteta reagon për herë të parë pas akuzave për përdhunim ndaj Thomas Partey

Futboll

Gazeta Express

21/07/2025 14:19

Trajneri i Arsenalit, Mikel Arteta, ka thyer heshtjen për rastin e Thomas Partey, pas akuzave zyrtare për përdhunim që rëndojnë mbi ish-mesfushorin e Topçinjve. Arteta deklaroi se është i bindur se klubi i ka ndjekur të gjitha procedurat siç duhet.

Në 4 korrik, Policia Metropolitane konfirmoi se Partey është akuzuar për pesë akuza për përdhunim dhe një për sulm seksual. Konkretisht, dy akuza kanë të bëjnë me një grua, tre të tjera me një grua të dytë, dhe një akuzë për sulm seksual me një të tretë. Ngjarjet e pretenduara thuhet se kanë ndodhur mes viteve 2021 dhe 2022.

Mesfushori ganez pritet të dalë në gjykatë më 5 gusht në Westminster Magistrates’ Court. Ai i ka mohuar të gjitha akuzat, ndërsa avokati i tij ka deklaruar për The Athletic:

“Ai tashmë mirëpret mundësinë që më në fund të pastrojë emrin e tij.”

Partey u arrestua fillimisht në korrik 2022 dhe çështja iu dorëzua Prokurorisë së Kurorës (CPS) në dhjetor 2024. Sipas ligjeve të Mbretërisë së Bashkuar, emri i tij nuk mund të bëhej publik deri në momentin kur u ngritën akuzat zyrtare këtë muaj.

Gjatë gjithë kësaj kohe, Partey vazhdoi të luante për Arsenalin, deri në përfundimin e kontratës së tij më 1 korrik 2025.

Në një konferencë për shtyp në Singapor, para fillimit të turit parasezonal të Arsenalit në Azi, Arteta u pyet për këtë çështje. Ai tha:

“Klubi ka qenë shumë i qartë në deklaratën e tij. Ka shumë çështje ligjore të ndërlikuara, prandaj nuk mund të komentoj më tej.”

Kur u pyet nëse është i sigurt që klubi ka ndjekur të gjitha procedurat siç duhet, ai u përgjigj shkurt:

“100 për qind.”

Në deklaratën zyrtare të Arsenalit pas publikimit të akuzave nga Policia Metropolitane thuhej:

“Kontrata e lojtarit përfundoi më 30 qershor. Për shkak të procedurave ligjore në vazhdim, klubi nuk mund të komentojë për këtë rast.” /GazetaExpress/