Mickoski i ashpër me nepotizmin në polici: Mbaroi koha e mesazheve “do ta rregulloj” dhe “do të lajmërohem”

Maqedoni

Gazeta Express

07/05/2025 20:39

Në Qendrën e Trajnimit të MPB-së në Idrizovë sot u mbajt manifestimi qendror me rastin e 7 Majit – Ditës së Policisë së Maqedonisë, në të cilin morën pjesë kryeministri Hristijan Mickoski, ministri i Punëve të Brendshme Pançe Toshkovski, drejtori i Byrosë së Sigurisë Publike në MPB Aleksandar Janev, udhëheqësia e ministrisë, ministra dhe anëtarë të korit diplomatik.

”Ka pasur kohë kur institucionet përdoreshin si mjet për interesa personale dhe politike, e jo për drejtësi. Mesazhet “do ta rregulloj” dhe “do të lajmërohem”, ishin më të zëshme se ligji, por kjo kohë ka mbaruar! Dua sot publikisht dhe zëshëm të them, në këtë shtet nuk ka më vend për lidhje, nepotizëm dhe mbrojtje nga përgjegjësia. Ligji vlen për të gjithë, pa dallim nëse bëhet fjalë për .qytetar të thjeshtë, funksionarë ose biznesmen”, deklaroi mes tjerash Mickoski.

Drejtësia mund të jetë e ngadaltë, por nuk duhet të jetë kurrë e verbër”, thuhet. Detyra jonë është t’i hapim sytë – nëpërmjet një policie profesionale, etike dhe të pakorruptueshme. Një forcë policore që do të luftojë krimin, pavarësisht nëse ai fshihet pas një maske, pozicioni apo parash. Dhe pikërisht kjo është arsyeja pse ne investojmë dhe do të vazhdojmë të investojmë tek ju – forca jonë policore. Ne do të investojmë në teknologji, pajisje, trajnime, por edhe në dinjitetin që ju takon. “Misioni juaj është i shenjtë – të ruani rendin, por edhe të ktheni besimin te qytetarët”, theksoi Mickoski.

Drejtori i Byrosë së Sigurisë Publike, Aleksandar Janev, theksoi në fjalimin e tij se beson në idenë se policia është mbrojtëse e shtetit dhe se uniforma dhe shenja që mbajnë nëpunësit policorë janë simbol i krenarisë, nderit dhe përgjegjësisë, jo i pushtetit.

“Në dhjetë muajt e fundit, ne kemi dëshmuar se institucioni mund të jetë i drejtë dhe i fortë. Ne kemi forcuar punën tonë operative, kemi rritur praninë tonë, kemi prezantuar modele të reja operative të punës dhe kemi filluar një epokë të re përmes transformimit digjital. Bandat kriminale, rrjetet e drogës, celulat terroriste janë çmontuar, vrasjet e pazgjidhura dekada më parë janë zgjidhur, krimet që lidhen me zhvatjen, trafikimin e paligjshëm të qenieve njerëzore, lojërat e paligjshme të fatit, shpërdorimet në institucione dhe falsifikimin e parave janë zbuluar. Ne po e pozicionojmë fuqishëm policinë e Maqedonisë në hartën ndërkombëtare, e kemi ngritur atë në një partner të ndershëm, të barabartë dhe të fortë të agjencive të zbatimit të ligjit nga rajoni, Evropa dhe bota, dhe përmes punës së përbashkët dhe të koordinuar, ne kontribuojmë në sigurinë rajonale dhe globale”, theksoi drejtori Janev.

Ministri Toshkovski theksoi se të jesh nëpunës policor nuk do të thotë vetëm të veshësh uniformë, të jesh nëpunës policor do të thotë të jesh vija e parë e mbrojtjes së atdheut, zëri i drejtësisë dhe mburoja e njeriut të rëndomtë.

“Konteksti modern i sigurisë është kompleks. Ne përballemi me forma të reja të krimit, sfida rajonale dhe globale, korrupsion, presione migrimi dhe rreziqe në rritje e sipër të sigurisë. Roli ynë sot është më i përgjegjshëm se kurrë. Në periudhën e kaluar, ne kemi treguar se dimë, mundemi dhe duhet të veprojmë në mënyrë efikase dhe vendimtare. Vitin e kaluar e mbyllëm me një ulje të krimit me pothuajse pesë përqind”, theksoi Ministri Toshkovski.

Ministri vazhdoi duke prezantuar rezultatet e Ministrisë në luftimin e të gjitha llojeve të krimit dhe korrupsionit dhe në afrimin e shërbimeve me qytetarët.

“Ne kemi asgjësuar katërmbëdhjetë grupe të krimit të organizuar, shumica e të cilave lidhen me trafikimin e drogës. Ne kemi nisur një luftë të fortë kundër korrupsionit që e gërryen plotësisht shoqërinë dhe është ngulitur në çdo pore të saj. Në atë fushë, po vërejmë një rritje të funksionit të zbulimit dhe këtu u shkatërruan dy grupe të krimit të organizuar me 26 anëtarë, njëra nga të cilat është nga fusha e korrupsionit të lartë. Në një veprim të koordinuar, dhjetorin e kaluar u shkatërrua një nga strukturat më të rrezikshme polikriminale, anëtarët e së cilës morën pjesë në tetë vrasje dhe kërcënime serioze ndaj nëpunësve të burgjeve. Dhe në muajt e parë të këtij viti po vazhdojmë me të njëjtin ritëm. Kohët e fundit, u ngritën kallëzime penale për keqpërdorime në sistemin e të drejtave sociale dhe invalidore kundër dyzet e nëntë personave”, ishin pjesë e rezultateve të policisë që Toshkovski iu referua.

Theks i veçantë iu vu edhe tragjedisë në diskoteken Puls në Koçan, në të cilën MPB-ja, pas një hetimi gjithëpërfshirës, ngriti kallëzime penale kundër shtatëdhjetë autorëve, përfshirë ministra aktualë dhe ish-ministra, kryetarë komunash, udhëheqës, nëpunës policorë dhe persona të tjerë përgjegjës, pa mbrojtje, pa selektivitet, pa hezitim.

Toshkovski në fund foli për reformat e vazhdueshme që po zhvillohen në MPB, futjen e shërbimeve të reja, prokurimin e pajisjeve të reja, uniformave të reja, automjeteve të reja, tendencën për rritjen e pagave në polici, projektin “Qyteti i Sigurt” dhe hapjen e policisë si një institucion që ecën krah për krah me qytetarët.

Pas fjalimeve hyrëse, udhëheqësia e MPB-së ndau pllaketa dhe certifikata mirënjohjeje për nëpunësit më të mirë policorë nga njësi të ndryshme organizative të policisë për promovimin e profesionalizmit dhe aktiviteteve operative të kryera nga institucionet dhe misionet diplomatike në vend.