Mexhiti: Koha prej një viti nuk ishte e mjaftueshme për ndryshimet kushtetuese

Maqedoni

Gazeta Express

30/08/2025 10:27

Çështja e ndryshimeve kushtetuese, të domosdoshme për vazhdimin e negociatave me Bashkimin Evropian, vijon të shkaktojë përplasje të ashpra mes pushtetit dhe opozitës në Maqedoninë e Veriut.

Pushteti në Maqedoninë e Veriut mbetet i vendosur kundër ndryshimeve kushtetuese në këtë fazë, gjë që u konfirmua edhe nga deklaratat e fundit të ministrit të Jashtëm, Timço Mucunski, në një intervistë për revistën Politiko. Ai theksoi se vendi nuk është i gatshëm të ndërmarrë ndryshimet e kërkuara nga Bullgaria, përveç nëse merr garanci të forta nga Bashkimi Evropian se ky do të jetë kushti i fundit i këtij lloji. “Frika jonë është: nëse bëjmë ndryshimet kushtetuese, çfarë do të ndodhë nëse pas gjashtë muajsh Bullgaria vjen përsëri me kërkesa që lidhen me historinë, identitetin ose gjuhën?”, deklaroi Mucunski.

Sipas tij, Maqedonia e Veriut është e përkushtuar ndaj reformave të tjera të nevojshme për integrimin evropian, të cilat nuk janë vetëm kërkesa të BE-së, por edhe domosdoshmëri për shoqërinë. “Nëse nesër shtetet anëtare na thonë se duhet të bëjmë më shumë në fushën e sundimit të ligjit ose qeverisjes së mirë – ne e kuptojmë këtë. Dhe jo vetëm që e kuptojmë, por e ndiejmë si detyrimin tonë”, shtoi ministri.

Zëvendëskryeministri Izet Mexhiti nga koalicioni VLEN pranoi se premtimi i dhënë për ndryshime kushtetuese brenda gjashtë muajve nuk është realizuar, duke theksuar se një vit qeverisje nuk mjafton për një proces kaq kompleks.

“VLEN për një vit është munduar. E ka në prioritetet e larta dhe nuk tërhiqemi nga prioritetet e larta. Besoj se do të ia arrijmë edhe kësaj. Koha prej një viti nuk është e mjaftueshme për zgjidhje të këtilla”, deklaroi Mexhiti.

Në anën tjetër, ish-ministri i Jashtëm dhe funksionar i BDI-së, Bujar Osmani, akuzoi qeverinë për shmangie të qëllimshme nga tema e BE-së.

“Është strategji. Pse? Se po u futët në kapitujt e BE-së do ju vijnë të gjithë mekanizmat e monitorimit… Këta nuk duan kontrolle nga BE. Duan kontroll autoritar të sistemit. BE do kërkojë barazi të bashkësive etnike. Këta kanë nisur një proces të demontimit të Marrëveshjes së Ohrit, të përjashtimit të shqiptarëve. Dhe lëvizje strategjike e vendit drejt botës serbe dhe botës ruse. Kjo është politika e kësaj qeverie. Trishtuese është bashkëpunimi i VLEN-it me këtë politikë”, tha Osmani.

Kryeministri Hristijan Mickoski ka përsëritur disa herë se ndryshimet kushtetuese nuk do të ndodhin, as para dhe as pas zgjedhjeve lokale, që sipas opozitës shqiptare përbën sabotim të hapur të rrugës evropiane.

Aleanca për Shqiptarët e Arben Taravarit reagoi ashpër ndaj qëndrimeve të VMRO-DPMNE-së.

“Mickoski bën mirë të ndërpresë lidhjet me Moskën, Budapestin dhe Beogradin dhe të ndalojë së qeni promotor i ‘Botës Serbe’. Shqiptarët nuk do të lejojnë kurrë që Maqedonia e Veriut të shndërrohet në armike të BE-së, NATO-s dhe SHBA-së”, thuhet në reagimin e partisë.

Ndryshimi i Kushtetutës, i cili përfshin shtimin e bullgarëve dhe komuniteteve tjera në të, kërkon shumicë prej dy të tretash në Parlament. Pa këtë hap, negociatat me BE-në nuk mund të nisin, edhe pse Maqedonia e Veriut zyrtarisht hapi bisedimet më 19 korrik 2022 pas miratimit të propozimit francez.